Ահաբեկչության դեմ պայքարում Ռուսաստանը հույսը դնում է ՀԱՊԿ-ի աջակցության վրա. Գրիզլով
ԵՐԵՎԱՆ, 7 ապրիլի. /Նովոստի-Արմենիա/. Միջազգային ահաբեկչության դեմ պայքարում Ռուսաստանը հույսը դնում է Հավաքական անվտանգության պայմանագրի կազմակերպության դաշնակիցների աջակցության վրա, չորեքշաբթի Սանկտ Պետերբուրգում ԽՎ մշտական հանձնաժողովի նիստից հետո ասաց Պետդումայի խոսնակ, ՀԱՊԿ Խորհրդարանական վեհաժողովի նախագահ Բորիս Գրիզլովը։
«Ահաբեկչության սպառնալիքը կանխելու համար պետք է գործի դնել բոլոր հնարավորություններն ու միջպետական կառույցները։ Այն սպառնալիք է ամբողջ աշխարհի համար, և միջազգային հասարակությունը պարտավոր է համախմբել իր ջանքերը՝ հենվելով ՀԱՊԿ-ի պես կազմակերպությունների ներուժի վրա»,- ասել է Գրիզլովը, հաղորդում է ՌԻԱ Նովոստին։
Ըստ նրա, խորհրդարանականները մշտական երկխոսություններ են անցկացնում բոլոր հարցերի շուրջ, որոնք արդիական են կազմակերպության համար և կապված են միջազգային անվտանգության ամրապնդման հետ։
«Դրանց թվում են՝ ՀԱՊԿ արագ արձագանքման հավաքական ուժերի ստեղծումը, թմրանյութերի տարածմանն ու անօրինական միգրացիային դիմակայելը, ռազմատեխնիկական համագործակցությունը և այլն»,- հաղորդեց նա։
Գրիզլովը նշեց, որ այս բոլոր թեմաները Խորհրդարանական վեհաժողովի մշտական հանձնաժողովների քննարկումների առարկան են։
«Կարող եմ ասել, որ մենք առաջխաղացում ունենք համագործակցության բոլոր առանցքային ուղղություններով։ ՀԱՊԿ-ն մեծ ներուժ ունի, և այն կիրականացվի խորհրդարանականների ակտիվ մասնակցության շնորհիվ»,- ասաց Պետդումայի խոսնակը։
ՀԱՊԿ անդամներն են՝ Հայաստանը, Բելառուսը,Ղազախստանը, Ղրղզստան, Ռուսաստանը, Տաջիկստանը և Ուզբեկստանը։ -0-
