ԵՐԵՎԱՆ, 5 հունիսի./Նովոստի–Արմենիա/. Արցախի Հանրապետության նախագահ Բակո Սահակյանը չորեքշաբթի անդրադարձել է այսօր լրագրողների հետ ճեպազրույցում «դավադիր ուժերի» հետ կապված ՀՀ Վարչապետ Նիկոլ Փաշինյանի հայտարարությանը:
Բանակցային գործընթացի քննարկումն ազնիվ և սկզբունքային է
«Առհասարակ, և՛ հիմա, և՛ նախկինում Ադրբեջանի հետ բանակցություններից առաջ և դրանցից հետո Հայաստանի Հանրապետության իշխանությունները տեղյակ էին պահում Արցախի ղեկավարությանը քննարկվող հարցերի և վերջին զարգացումների մասին»,– ասել է Արցախի նախագահն
«Արցախպրես» լրատվական գործակալությանը և «Ազատ Արցախ» թերթին տված հարցազրույցում` պատասխանելով Փաշինյանի այն հայտարարությանը, թե նախորդ իշխանությունների ժամանակ Արցախի ղեկավարությունը տեղյակ չի եղել բանակցային գործընթացի մանրամասներին։
Արցախի նախագահն ավելացրել է, որ Փաշինյանի` Հայաստանի վարչապետի պաշտոնը ստանձնելուց հետո բանակցային գործընթացն այն առաջնային հարցերից էր, որոնց շուրջ քննարկումներ են եղել նրանց միջև: Բակո Սահակյանը դրանք որակել է ազնիվ և սկզբունքային, ինչի մասին բազմիցս հրապարակայնորեն հայտարարել է:
Լիարժեք ֆորմատ` Արցախի մասնակցությամբ
Սահակյանը նշել է, որ վերջերս Հայաստանի վարչապետը տրամադրել է Արցախի իշխանությանը որոշ փաստաթղթեր բանակցային գործընթացի մասին: Արցախի իշխանություններն էլ իրենց հերթին, Սահակյանի խոսքով, Հայաստանի վարչապետին են փոխանցել բանակցային գործընթացին առնչվող իրենց մոտ առկա փաստաթղթերի փաթեթը:
Այս համատեքստում նա ընդգծել է, որ շահարկումներ թույլ չտալու լավագույն և գուցե միակ հնարավորությունը բանակցությունների լիարժեք ձևաչափի վերականգնումն է՝ Արցախի անմիջական մասնակցությամբ:
Загружается новость ...
"Право"
Կա դավադիր` կա պատիժ
Պատասխանելով Փաշինյանի կողմից հողեր ծախելու և դավադիր ուժերի առկայության վերաբերյալ հարցին` Բակո Սահակյանը նշել է, որ եթե կան դավադիրներ, նրանք պատժվելու են, և եթե որևէ մեկին հայտնի են կոնկրետ անձինք և նրանց դավադրության ապացուցված փաստեր, ապա պետք է տեղեկացնեն, և իշխանությունները համապատասխան քայլեր կձեռնարկեն:
Ընդգծելով երկու պետությունների ձեռք բերած միասնականությունը, Բակո Սահակյանն անթույլատրելի է համարել այն խարխլելուն ուղղված ցանկացած քայլ՝ լինի դա Արցախում, Հայաստանում, թե Սփյուռքում:
Դավադրական և կասկածամիտ պահելաձևին` ոչ
«Անընդունելի եմ համարում դավադրական պահելաձևն առհասարակ: Եթե կան կասկածներ, անվստահություն այս կամ այն երևույթի, անձի կամ պաշտոնյայի նկատմամբ, կարևոր եմ համարում այդ բոլոր հարցերի շուրջ փոխադարձ հարգանքի մթնոլորտում քննարկումների և ընդհանուր հայտարարի գալու անհրաժեշտությունը»,– ընդգծել է Արցախի առաջնորդը, հավելելով, որ պետք է անել ամեն ինչ հայրենիքի միասնականությունը պահպանելու համար: -0-
