Հայաստանի պետական ֆիլհարմոնիկ նվագախումբը 2012թ.-ին հյուրախաղերով ելույթ կունենա Եվրոպայում և ԱՄԷ-ում

Հայաստանի պետական ֆիլհարմոնիկ նվագախումբը 2012թ.-ին հյուրախաղերով ելույթ կունենա մի շարք եվրոպական երկրներում և Արաբական Միացյալ Էմիրություններում, երկուշաբթի ասաց նվագախմբի գլխավոր դիրիժոր և գեղարվեստական ղեկավար Էդուարդ Թոփչյանը:

«Մարտի 27-ին մենք ելույթ կունենանք Դուբայում՝ Հովհաննես Չեքիջյանի երգչախմբի հետ միասին, այնուհետև՝ մայիսին, մեկ օրով մենք կմեկնենք Վոլգոգրադ, որտեղ ելույթ կունենանք հայտնի ջութակահար Վադիմ Ռեխինի հետ»,- երկուշաբթի լրագրողներին ասաց Թոփչյանը:

Նվագախմբի գլխավոր դիրիժորը նշեց, որ 2012թ.-ի նոյեմբերին նույնպես նախատեսվում է մի շարք եվրոպական երկրներով շրջագայություն, մասնավորապես՝ Իտալիա, Իսպանիա, Գերմանիա և Ավստրիա:

Նա ավելացրեց նաև, որ անհամբերությամբ է սպասում նվագախմբի լայնամասշտաբ  ասիական շրջագայությանը, որը կսկսվի 2013թ.-ին և կտևի մինչև տարվա կեսը:

Մասնավորապես, ասիական շրջագայության շրջանակներում նվագախումբը պետք է ելույթ ունենա Չինաստանում, Հարավային Կորեայում և Ճապոնիայում, իսկ տվյալ պահին սպասում է ճապոնական կողմի վերջնական որոշմանը, որն էլ հովանավորելու է նվագախմբի շրջագայությունը:

Հայաստանի պետական ֆիլհարմոնիկ նվագախումբը հիմնադրվել է 1936թ.-ին՝ ականավոր հայ երաժիշտ Կոնստանտին Սարաջևի կողմից: -0-