ԵՐԵՎԱՆ, 19 հունվարի. /Նովոստի-Արմենիա/. Հայկական բանակի ստեղծման 20-ամյակին նվիրված տոնական միջոցառումները կտևեն երկու օր, ասել է ՀՀ պաշտպանության նախարար Սեյրան Օհանյանը:
Հայկական բանակը ստեղծվել է 1992 թ.-ի հունվարի 28-ին, երբ ՀՀ կառավարությունը ընդունեց «Հայաստանի Հանրապետության պաշտպանության նախարարության մասին» պատմական որոշումը, և հրապարակվեց նախարարի առաջին հրամանը:
«Հունվարի 27-ի կեսօրին ՀՀ նախագահի մոտ պարգևատրման արարողություն կկազմակերպվի, իսկ երեկոյան՝ բանակի 20-ամյակին նվիրված հանդիսավոր համերգ», - հինգշաբթի կառավարության նիստի ժամանակ ասել է Օհանյանը:
Նախարարի խոսքերով՝ հունվարի 28-ին այցելություն կկազմակերպվի դեպի «Եռաբլուր», ինչպես նաև գերատեսչական մեդալների պարգևատրման արարողություն և հանդիսավոր ընթրիք:-0-
