Սոճիների անօրինական հատման ընդամենը մեկ դեպք է գրանցվել ամանորյա տոների ընթացքում, չորեքշաբթի տեղեկացրեց ՀՀ գյուղատնտեսության նախարարության «Հայանտառ» ՊՈԱԿ-ի պետ Ռուբեն Պետրոսյանը:
«Ամանորյա տոների ընթացքում երկրում սոճիների անօրինական ծառահատման ընդամենը մեկ դեպք է գրանցվել, երբ Հայաստանի հյուսիս-արևմուտքում հատվել է 28 ծառ», - ասաց նա:
Գլխավոր անտառապետը նշեց, որ 2011 թ.-ին երկրում անօրինական հատվել է 2425 ծառ: Միաժամանակ նա ընդգծեց, որ անտառային տնտեսությանը մեծ վնաս է հասցնում ոչ այնքան անօրինական ծառահատումը, որքան անտառային հրդեհները:
Պետրոսյանը պարզաբանեց, որ գյուղացիների կողմից անտառին հարակից ցանքատարածքները վառելու հետևանքով հրդեհը տարածվում է դեպի անտառներ, իսկ ձնածածկի բացակայությունը նպաստում է կրակի արագ տարածմանը:
«Նախորդ տարվա դեկտեմբերին մենք հրդեհ ենք մարել Տաշիրում (ՀՀ հյուսիս), որտեղ կրակը տարածվել էր 260 մետրի վրա՝ դեպի անտառի խորքը», - ասաց գլխավոր անտառապետը:
Նա նաև նշեց, որ 2011 թ.-ին հրդեհվել է 470 հեկտար անտառային մակերես, Հայաստանում կա շուրջ 332 հազար հեկտար անտառածածկ տարածք:
Պետրոսյանն ընդգծեց, որ այսօրվա դրությամբ երկրի օրենսդրությունում արդեն փոփոխություններ են արվել, որոնք արգելում են վառել անտառների մոտակայքում գտնվող գյուղատնտեսական ցանքատարածքները:-0-
