Հայկական հասարակությունն այսօրվա դրությամբ պատրաստ չէ 100 տոկոսանոց համամասնական ընտրական համակարգի անցմանը, կարծում է իշխող Հայաստանի Հանրապետական կուսակցության խորհրդարանական խմբակցության պատգամավոր Արտակ Զաքարյանը:
Խորհրդարանում ներկայացված «Ժառանգություն» և Դաշնակցություն ընդդիմադիր կուսակցությունները 2011թ. դեկտեմբերի 27-ին համատեղ հայտարարություն են տարածել, որում կոչ են անում հրաժարվել մեծամասնական ընտրական համակարգից:
«Մեր գործընկերներն առաջարկում են ներմուծել այդ համակարգը (100 տոկոսանոց համամասնականը)՝ ողջ հանրապետությունը բազմամանդատ ընտրական տեղամասի վերածելով, իսկ մենք առաջարկում ենք մեր ընտրողների երկու հնարավորություն տալ (ընտրությունների խառը համակարգի շնորհիվ)՝ արդյունքում ունենալով միևնույն քանակը՝ խորհրդարանի 131 պատգամավոր, ովքեր հավասար իրավունքներ ունեն»,- երկուշաբթի մամուլի ասուլիսի ժամանակ ասաց Զաքարյանը:
Նա ընդգծեց, որ Հայաստանում գործում է խառնված ընտրական համակարգի դասական տեսակը, որն ընդունված է բազմաթիվ երկրներում և ընտրողներին առավել շատ հնարավորություններ է տալիս կուսակցություններ և թեկնածուներ ընտրելիս:
Ըստ Զաքարյանի՝ 100 տոկոսանոց համամասնական ընտրական համակարգի ներմուծումը Հայաստան կարող է իրականություն դառնալ միայն այն բանից հետո, երբ լիովին կկայանան հանրապետության բոլոր քաղաքական ուժերն ու կուսակցությունները, իսկ այսօր գործող մեծամասնական համակարդը քաղաքացիներին հնարավորություն է ընձեռում ընտրել առանձին անձանց, որոնց նկատմամբ քաղաքացիները վստահություն ունեն և ովքեր ունակ են պաշտպանել նրանց շահերը:
Միաժամանակ «Ժառանգություն» խորհրդարանական ընդդիմադիր խմբակցության անդամ Արմեն Մարտիրոսյանը վստահություն հայտնեց, որ համամասնական համակարգի լիարժեք ներմուծումն արդար և թափանցիկ ընտրությունների անցկացում կապահովի և կվերականգնի քաղաքացու վստահությունն ընտրական գործընթացի հանդեպ:
Ներկայումս ՀՀ Ազգային ժողովը բաղկացած է 131 պատգամավորից՝ 41 պատգամավոր ընտրվում է մեծամասնական, իսկ 90-ը՝ համամասնական ընտրահամակարգով:
Հայաստանի հերթական խորհրդարանական ընտրությունները կանցկացվեն 2012թ.-ի մայիսին: -0-
