Մեծ Բրիտանիան չեզոք դիրք է զբաղեցնում ղարաբաղյան խնդրի առնչությամբ, ասաց Հայաստանում Մեծ Բրիտանիայի արտակարգ և լիազոր դեսպան Չարլզ Լոնսդեյլը՝ Facebook-ի դեսպանատան էջում առցանց ռեժիմով պատասխանելով «Նովոստի-Արմենիա» գործակալության հարցին:
«Մեծ Բրիտանիան, բնականաբար, չեզոք դիրք է զբաղեցնում ղարաբաղյան հակամարտության հարցում... Հիմնական նպատակն ամուր, խաղաղ կարգավորումն է, որը պետք է ընդունելի լինի բոլոր կողմերի համար»,- ասաց Լոնսդեյլը՝ մեկնաբանելով Ղարաբաղի հարցով Լոնդոնի դիրքորոշումը՝ հաշվի առնելով Ադրբեջանում բրիտանական կողմի տնտեսական շահերը, մասնավորապես՝ նավթային ոլորտում:
«Մեծ Բրիտանիան, իհարկե, Ադրբեջանում բիզնես շահեր ունի: Դա նշանակում է, որ մենք կայունություն ենք ցանկանում տարածաշրջանի համար ընդհանրապես»,-ասաց դեսպանը: Ըստ նրա՝ դրան հասնելու համար անհրաժեշտ է ապահովել տարածաշրջանի բոլոր երկրների անվտանգությունը, կայունությունն ու բարգավաճությունը, այդ թվում նաև՝ Հայաստանի:
Միաժամանակ դեսպանը նշեց, որ բրիտանական կողմն աջակցում է բանակցությունների ճանապարհով հակամարտության խաղաղ կարգավորմանը, որը հիմնված է միջազգային իրավունքի սկզբունքների վրա, այդ թվում՝ տարածքային ամբողջականություն, ինքնորոշում և ուժի կամ ուժի սպառնալիքի չկիրառում: Նա նշեց, որ Մեծ Բրիտանիան սատարում է խնդրի կարգավորման գործում կողմերին աջակցելու ԵԱՀԿ Մինսկի խմբի ջանքերին:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
