ՀՀ նախագահն ընտրվել է ՀՀԿ-ի համագումարի պատվիրակ

Հայաստանի Հանրապետության նախագահ, Հայաստանի հանրապետական կուսակցության (ՀՀԿ) նախագահ Սերժ Սարգսյանն ուրբաթ  ընտրվել է ՀՀԿ առաջիկա 13-րդ համագումարի պատվիրակ, հայտնում է պետության ղեկավարի մամուլի ծառայությունը:

«Նախագահն այսօր մասնակցել է ՀՀԿ Կենտրոն տարածքային կազմակերպության «Սայաթ-Նովա-2» և «Մետաքս-1» սկզբնական կազմակերպությունների ժողովին, որի օրակարգում եղել է պատվիրակների ընտրության հարցը: Քվեարկության արդյունքում Սերժ Սարգսյանն ընտրվել է համագումարի պատվիրակ»,- ասվում է հաղորդագրության մեջ:

Նախագահ Սերժ Սարգսյանը շնորհակալություն է հայտնել վստահության համար և պատասխանել ժողովի մասնակիցներին հետաքրքրող հարցերին:

Համագումարի անցկացման ամսաթիվն առայժմ հայտնի չէ:

Իշխող ՀՀԿ-ն 131-տեղանոց խորհրդարանում ամենաշատ տեղերն ունի՝ 63 մանդատ: Կուսակցությունը գլխավորում է ՀՀ նախագահ Սերժ Սարգսյանը: Կուսակցությանն են ամրագրված ՀՀ ԱԺ խոսնակի և կառավարության ղեկավարի պաշտոնները, ինչպես նաև մի քանի նախարարական պորտֆել:--0—