Երևանում Գարեգին Նժդեհի 125-ամյակին նվիրված գիտաժողով կանցկացվի

«Գարեգին Նժդեհի գործունեությունը Սփյուռքում» խորագրով գիտաժողովը նախատեսված է անցկացնել դեկտեմբերի 15-ին ՀՀ ԳԱԱ-ում: Այն կնվիրվի մեծ զորավար և գաղափարախոս Գարեգին Նժդեհի 125-ամյակին, հաղորդում է ՀՀ սփյուռքի նախարարության մամուլի ծառայությունը:

Գիտաժողովի 4 նիստերում կքննարկվեն «Հայապահպանության, ազգային ինքնության և դաստիարակության հարցերը Գարեգին Նժդեհի գաղափարախոսության մեջ», «Գործնականը և գաղափարախոսականը Գարեգին Նժդեհի սփյուռքյան գործունեության մեջ», «Գարեգին Նժդեհ. զորավարը և մտածողը», «Գարեգին Նժդեհը` մանկավարժի և ուսանողի տեսանկյունից» թեմաները:

Միջոցառման շրջանակներում նիստերը կվարեն ԵՊՀ ռեկտոր Արամ Սիմոնյանը և ՀՀ ԳԱԱ պատմության ինստիտուտի տնօրեն Աշոտ Մելքոնյանը, Հայաստանի ազգային արխիվի տնօրեն, պատմական գիտությունների դոկտոր Ամատունի Վիրաբյանը, Հայաստանի ազգային արխիվի տնօրենի տեղակալ, պատմական գիտությունների թեկնածու Էդգար Հովհաննիսյանը:
Միջոցառման կազմակերպիչներն են ՀՀ սփյուռքի նախարարությունը, ՀՀ ԳԱԱ-ն, ԵՊՀ-ն ու «Նորավանք» գիտակրթական հիմնադրամը:
Գարեգին Նժդեհը (Գարեգին Տեր-Հարությունյան) հայտնի հայ պետական գործիչ և գաղափարախոս է (1886-1955 թթ.), ով XX դարի սկզբին պայքարել է Հայաստանի կայացման և նրա տարածքային ամբողջականության պահպանման համար: Հայ ժողովրդի ազգային ինքնորոշման պաշտպանությունը քարոզող ուսմունքի հեղինակն է:-0-