Հայաստանի և Իտալիայի արտգործնախարարներ Էդվարդ Նալբանդյանն ու Ջուլիո Տերցին նշում են բազմադարյան փոխհարաբերությունների առավել մեծ ամրապնդման և խորացման կարևորությունը, երեքշաբթի հաղորդում է հայկական ԱԳՆ մամուլի ծառայությունը:
Նալբանդյանը գտնվում է Իտալիայում՝ ՀՀ նախագահ Սերժ Սարգսյանի գլխավորած պաշտոնական պատվիրակության կազմում:
Նախօրեին տեղի ունեցած հանդիպման ընթացքում Հայաստանի և Իտալիայի արտգործնախարարներն անդրադարձան հայ-իտալական քաղաքական, առևտրատնտեսական և մշակութային հարաբերությունների զարգացման, իրավապայմանագրային դաշտի ընդլայնմանն առնչվող հարցերի:
Մշակութային փոխանակումների տեսանկյունից նախարար Նալբանդյանը կարևորեց Հռոմում «Դվին. Հայաստանի մայրաքաղաքը Եվրոպայի և Ասիայի միջև» և Վենետիկում «Հայաստան. Քաղաքակրթության դրոշմներ» ցուցահանդեսների անցկացումը և շնորհակալություն հայտնեց Իտալիայի կառավարության աջակցությամբ Հայաստանում մշակութային արժեքների վերականգնողական կենտրոնի հիմնադրման համար:
Բանակցությունների ընթացքում քննարկվեցին Հայաստան - Եվրոպական միություն համագործակցության տարբեր ուղղությունները, Եվրոպական հարևանության քաղաքականության և Արևելյան գործընկերություն ծրագրի շրջանակներում իրականացվող նախագծերը:
Հայաստանի և Իտալիայի արտաքին քաղաքական գերատեսչությունների ղեկավարներն անդրադարձան միջազգային և տարածաշրջանային խնդիրների: Այս համատեքստում արտգործնախարար Նալբանդյանը ներկայացրեց Լեռնային Ղարաբաղի հիմնախնդրի խաղաղ կարգավորման գործընթացի վերջին զարգացումները: -0-
