Հայաստանում պահնորդների և թիկնապահների գործունեությունն առաջին անգամ օրենսդրորեն կկարգավորվի

Հայաստանի Ազգային ժողովը երեքշաբթի առաջին ընթերցմամբ ընդունեց «Մասնավոր պահնորդական գործունեության մասին» օրինագիծը և հարակից օրենքների մի շարք լրացումներ, որոնք նախատեսում են մասնավոր պահնորդական գործունեության և թիկնապահների ծառայությունների ոլորտի օրենսդրական կարգավորում:

«Մենք փորձեցինք կարգավորել այս բնագավառում առկա բոլոր խնդիրները, օրինակ, զենքի ձեռքբերումը, լիցենզավորումը և օգտագործումը: Նաև, հաշվի առնելով հասարակական արձագանքը, առաջարկվում են թիկնապահների գործունեության մի շարք սահմանափակումներ»,- ասաց օրինագծի հեղինակներից մեկը՝ պատգամավոր Հովհաննես Սահակյանը:

Ըստ նրա, օրինագծի ընդունման դեպքում այն անձինք, ովքեր ցանկանում են իրավաբանական անձանց թիկնապահներ լինել, պետք է ստանան որակավորման հավաստագիր, ինչի համար անհրաժեշտ է նախապես հատուկ դասընթացներ անցնել:

«Բացի այդ, վարչական պատասխանատվություն է նախատեսվում թիկնապահների ծառայությունների, ինչպես նաև մասնավոր պահնորդական գործունեության անօրինական տրամադրման և դրանցից օգտվելու համար»,- նշեց նա:
Պատգամավորն ընդգծեց նաև, որ լրացումներին համապատասխան չմարված դատվածություն ունեցող անձինք զրկվում են որպես թիկնապահ աշխատելու իրավունքից:

«Օրինագծի համաձայն, պահպանվող անձին չի կարող ուղեկցել մեկից ավելի տրանսպորտային միջոց և երեքից ավելի թիկնապահ: Պետական գերատեսչությունների և տեղական ինքնակառավարման մարմինների պաշտոնատար անձինք չեն կարող օգտվել թիկնապահների ծառայություններ տրամադրող մասնավոր ձեռնարկությունների ծառայություններից»,- ավելացրեց Սահակյանը:

Բացի այդ, ինչպես ընդգծեց պատգամավորը, պահնորդներն ու թիկնապահներն աշխատանքային ժամերին պետք է կրեն համազգեստ, որը պետք է տարբերվի պետական պահպանության մարմինների աշխատակիցների հատուկ համազգեստից:

Օրինագիծը պատրաստվել է ընդդիմադիր ՀՅԴ խմբակցության և Հայաստանի Հանրապետական կուսակցության կողմից կառավարության համագործակցությամբ: -0-