«Հասնել զրոյի» կարգախոսով ՁԻԱՀ-ի դեմ պայքարի օրն է նշվում Հայաստանում՝ հասարակության ուշադրությունը ՄԻԱՎ-ի խնդիրներին հրավիրելու նպատակով, հինգշաբթի լրագրողներին հայտնեց Հայաստանում ՄԱԿ-ի մշտական համակարգող Դաֆինա Գերչևան:
«Հասնել զրոյի» կարգախոսը ենթադրում է զրոյական ցուցանիշի ապահովում մի քանի ասպեկտներով՝ ՁՒԱՀ-ի նոր դեպքերի, մահվան դեպքերի կանխման և վարակակիրների խտրականության բացառման ուղղությամբ:
«Մենք հավաքվում ենք ամեն տարի դեկտեմբերի 1-ին, որ հիշենք ՄԻԱՎ-ից մահացածներին և միաժամանակ կոչ ենք անում հասարակությանը պաշտպանել ՄԻԱՎ-վարակակիրներին: Վստահ եմ, որ հասարակության և կառավարության հետ համատեղ կարող ենք հաջողության հասնել»,- ասաց Գերչևան:
Հայաստանի առողջապահության փոխնախարար Տիգրան Սահակյանն իր հերթին նշեց, որ բոլոր վարարակիրների համար հասանելի է բուժօգնությունն ու աջակցությունը:
«Մենք աջակցում ենք մեզ օգնության համար դիմած բոլոր հիվանդներին, ինչպես նաև արհեստական կաթ ենք տրամադրում այն երեխաներին, ում մայրերը ՄԻԱՎ-վարակակիրներ են: Պետք է նշեմ, որ մենք ՄԻԱՎ-ի դեմ պայքարի 2012-2016 թվականների նոր ծրագիր ենք մշակում, որը կներկայացվի խորհրդարանի հաստատմանը»,- ասաց Սահակյանը:
Միաժամանակ «Դրական մարդկանց հայկական ցանց» հասարակական կազմակերպության նախագահ Անահիտ Հարությունյանը նշեց, որ հաջողության հասնելու համար, նախևառաջ, պետք է փոխել հասարակության վերաբերմունքը վարարակիրների նկատմամբ:
«Իրազեկվածության մակարդակի բարձրացման դեպքում վարակվելու հավանականությունը զգալիորեն նվազում է: Մենք պետք է նպաստենք երիտասադրության իրազեկության մակարդակի բարձրացմանը: Միաժամանակ, հասարակությունը պետք է օգնի արդեն իսկ վարակված մարդկանց, ոչ թե մեկուսացնի նրանց»,- կարծում է նա:
2011 թվականի համաշխարհային վիճակագրական տվյալների համաձայն՝ ողջ աշխարհում ապրում է մոտ 34 միլիոն ՄԻԱՎ-վարակակիր: 1997 թվականի համեմատ նոր վարակվածության թիվը նվազել է 21 տոկոսով:
2011 թվականի հոկտեմբերի 31-ի տվյալներով՝ Հայաստանում գրանցված է 1127 ՄԻԱՎ-վարակակիր, այդ թվում՝ միայն 2010 թվականին արձանագրվել է 148 դեպք, այսօր նրանց մեծամասնությունը՝ 70,7 տոկոսը կազմում են տղամարդիկ, իսկ մոտ 2 տոկոսը երեխաներ են: 2007 թվականից առայսօր Հայաստանում չի արձանագրվել մորից երեխային փոխանցված ՄԻԱՎ-վարակի ոչ մի դեպք:
Ամեն տարի դեկտեմբերի 1-ին Առողջապահության համաշխարհային կազմակերպության (ԱՀԿ) և ՄԱԿ-ի Գերագույն ասամբլեայի՝ 1988 թվականի որոշման համապատասխան, նշվում է Ձեռքբերովի իմունային անբավարարության համախտանիշի (ՁԻԱՀ) դեմ պայքարի համաշխարհային օրը: -0-
