Հայ-վրացական պետական սահմանին մաքսակետերի համատեղ կառավարման հարցը քննարկվել է երեքշաբթի Թբիլիսիում երկու երկրների կառավարական պատվիրակությունների հանդիպման ընթացքում, լրագրողներին տեղեկացրել է Վրաստանի ԱԳ նախարար Գրիգոլ Վաշաձեն:
ՀՀ նախագահ Սերժ Սարգսյանի՝ Թբիլիսի կատարած երկօրյա այցի ընթացքում Վրաստանի ՆԳՆ-ի և ՀՀ ազգային անվտանգության ծառայության միջև «Սահմանային ոլորտում համագործակցության մասին» համաձայնագիր է ստորագրվել:
«Երկկողմ հանդիպման ընթացքում քննարկվել է երկկողմ հարաբերությունների լայն շրջանակ, առաջին հերթին՝ առևտրային հարաբերություններին, էներգետիկային, ենթակառուցվածքի զարգացմանը վերաբերող հարցեր, մասնավորապես՝ մաքսակետերի համատեղ կառավարումը՝ նվազագույնի հասցնելու համար այն ժամանակը, որը Վրաստանի և Հայաստանի քաղաքացիները ծախսում են հսկիչ անցակետերում», - ասել է Վաշաձեն, հաղորդում է ՌԻԱ Նովոստին:
Վրաստանի էկոնոմիկայի և կայուն զարգացման նախարար Վերա Կոբալիան երեքշաբթի լրագրողներին տեղեկացրել է, որ Վրաստայի և Հայաստանի հսկիչ անցակետերում կսկսի գործել «մեկ պատուհանի» սկզբունքը:
«Օրինակ, եթե ավտոմեքենան հայկական կողմից անցել է հսկողությունը, ապա արդեն երկրորդ հսկիչ անցակետում նրան կանգնեցնելու անհրաժեշտություն չի լինի: Հսկիչ անցակետերում ստուգման երկարատև ընթացակարգերը խոչընդոտում են բիզնեսին և զբոսաշրջության զարգացմանը», - հայտարարել է Կոբալիան:
Նա նաև «Նովոստի-Գրուզիա» գործակալությանը տեղեկացրել է, որ Վրաստանի և Հայաստանի միջև ապրանքաշրջանառությունը ինն ամսվա ընթացքում կազմել է 238 մլն դոլար, ինչը 30 տոկոսով ավել է նախորդ տարվա նույն ժամանակահատվածի համեմատ: Դեպի Հայաստան Վրաստանի արտահանումը կազմել է 185 մլն դոլար:
Ինչպես երկուշաբթի ճեպազրույցի ընթացքում տեղեկացրել է Վրաստանի փոխարտգործնախարար Նինո Քալանդաձեն, Սարգսյանի այցը պատասխան է տարեսկզբին Երևան այցելած Վրաստանի նախագահ Միխայիլ Սահակաշվիլու այցին:-0-
