ԵՐԵՎԱՆ, 23 նոյեմբերի. /Նովոստի-Արմենիա/. Հայաստանը կարող է մասնակցել հանուն ՅՈՒՆԵՍԿՕ-Գիլերմո Կանո տպագրության ազատության (UNESCO/Guillermo Cano World Press Freedom Prize) համաշխարհային մրցանակ ստանալու մրցույթին, հաղորդում է ՀՀ ԱԳՆ-ի մամուլի ծառայությունը:
«Մրցանակը շնորհվում է ամեն տարի և բաղկացած է մեդալից ու դրամական պարգեւից: Մրցանակը նախատեսված է այն անձանց, կազմակերպությունների կամ հաստատությունների համար, որոնք նշանակալից ներդրում են ունեցել աշխարհում մամուլի ազատության պաշտպանության/աջակցման գործում` հատկապես վտանգ ներկայացնող պայմաններում»,- նշվում է հանրապետության ԱԳՆ հաղորդագրության մեջ:
Հաղորդագրության համաձայն, ՅՈՒՆԵՍԿՕ-ի գլխավոր տնօրեն Իրինա Բոկովայի առաջարկով կազմակերպության անդամ երկրները կարող են ներկայացնել թեկնածություններ UNESCO/Guillermo Cano World Press Freedom Prize մրցանակի համար:
Թեկնածուին ներկայացնող կազմակերպությունը պետք է անգլերեն կամ ֆրանսերեն լեզուներով հիմնավորի վերջինիս ընտրությունը, իսկ առաջադրված թեկնածուն` լրացնի կից ներկայացվող ձևաթերթը:
«Խնդրում ենք քննության առնել վերոշարադրյալը և համապատասխան թեկնածուների առկայության դեպքում մինչև 2012թ. փետրվարի 1-ը ՀՀ լրագրողների միության միջոցով ՀՀ ԱԳ նախարարությանը տրամադրել բոլոր պահանջվող փաստաթղթերը»,- նշվում է հաղորդագրության մեջ:
ՅՈՒՆԵՍԿՕ/Գիլերմո Կանո համաշխարհային մրցանակը ստեղծվել է 1977թ.-ին ՅՈՒՆԵՍԿՕ-ի գործոող խորհրդի որոշմամբ: Մրցանակը կրում է կոլումբացի լրագրող Գիլերմո Կանոյի անունը, ում սպանել են երկրում հզոր նարկոկարտելի գործունեությունը մերկացնելու համար: Մրցանակի շնորհման թեկնածություններն առաջարկվում են խոսքի ազատությունը պաշտպանող տարածաշրջանային և միջազգային կազմակերպությունների կողմից: -0-
