Դիմակավոր անձինք Հայաստանում գյուղացիների տնից ավելի քան 7 հազար դոլար և մեկ պարկ ընկույզ են գողացել

Նախօրեին երեկոյան ատրճանակով և դանակներով զինված դիմակավոր երեք անձինք ավազակային հարձակում են գործել ՀՀ Կոտայքի մարզի Ողջաբերդ գյուղի տներից մեկի վրա, հաղորդում է հանրապետության ոստիկանության մամուլի ծառայությունը:

Հաղորդագրության համաձայն՝ կատարվածի մասին ահազանգը ստացվել է ոստիկանության Կոտայքի բաժին այսօր՝ ժամը 03.40-ին:

«Գողերը մուտք են գործել նշված գյուղի տներից մեկն ու ատրճանակի և դանակի սպառնալիքով կպչուն ժապավենով կապկպելով տանտիրոջն ու տանտիրուհուն՝ ծեծի են ենթարկել նրանց և հափշտակել 7.200 ԱՄՆ դոլար, 1 պարկ ընկույզ, «Նաիրի» տեսակի 7 կոնյակ, 1 դույլ նուշ»,-ասվում է հաղորդագրության մեջ:

Գողերին հաջողվել է փախուստի դիմել:

Տանտերը ստացած մարմնական վնասվածքներով տեղափոխվել է հիվանդանոց:

Կատարվում է նախաքննություն: -0-