ԵՐԵՎԱՆ, 10 նոյեմբերի. /Նովոստի-Արմենիա/. «Երևան քաղաքի սեյսմիկ ռիսկի կառավարման և գնահատման ծրագրավորում» ծրագրի արդյունքները, որն իրականացվում է ՀՀ ԱԻՆ-ի կողմից Միջազգային համագործակցության ճապոնական գործակալության (JICA) հետ համատեղ, կամփոփվեն 2013 թ.-ի գարնանը, տեղեկացրել է ՀՀ ԱԻՆ փրկարար ծառայության Բնակչության և տարածքի պաշտպանության վարչության պետ, գնդապետ Հովհաննես Եմիշյանը:
«Ծրագիրը մեկնարկել է 2010 թ.-ի սեպտեմբերին և կտևի շուրջ 2,5 տարի: Երբ մենք կամփոփենք ծրագրի վերջնական արդյունքները, բոլորն առանց բացառության կկարողանան ծանոթանալ դրանց հետ», - հինգշաբթի տեղեկացրել է նա այս ծրագրի իրագործման համակարգման հանձնաժողովի հինգերորդ նիստի ժամանակ:
Եմիշյանը նշել է, որ ծրագրի շրջանակներում հիմնական շեշտը դրվել է Գառնու սեյսմիկ խզվածքի հետազոտման վրա՝ ավելացնելով, որ աշխատանքներ են ընթանում նաև երկրաշարժի դեպքում վարքագծի կանոնների մասին հասարակության իրազեկվածության բարձրացման ուղղությամբ:
«Հայաստանը սեյսմավտանգ երկիր է, և մենք ունենք մեր ակտիվ սեյսմիկ խզվածքները, որոնք ամեն տարի ուսումնասիրվում են: Մենք անում ենք հնարավոր ամեն ինչ՝ ստորգետնյա ցնցումենրի հնարավոր հետևանքների մեղմացման համար», - ասել է նա՝ ավելացնելով, որ Թուրքիայի Վան գավառում վերջերս տեղի ունեցած երկրաշարժերը չեն կարող էական ազդեցություն ունենալ Հայաստանի վրա:
JICA-ի ներկայացուցիչ Ջուն Մուրականին իր հերթին նշել է, որ Երևանի սեյսմիկ ճեղքվածքը լրացուցիչ ուսումնասիրման կարիք ունի, և այսօր դժվար է կանխատեսումներ անել նրա հնարավոր ակտիվացման և հետևանքների մասին:
«Անցկացված հետազոտությունները ցույց են տվել, որ Երևանի մոտակայքում այս պահին սեյսմիկ փոքր ռիսկի գոտի է Գառնու խզվածքը, որի ակտիվացումը կարող է մայրաքաղաքում լուրջ փլուզումների հանգեցնել», - ավելացրել է ճապոնացի փորձագետը:
Ծրագրի առաջին փուլի շրջանակներում Երևանի խզվածքի մասին տեղեկատվություն է հավաքվել, ուսումնասիրվել են հիմնական նյութերը, Երևանի գրունտը, նախագծվել է սեյսմիկ վտանգի կառավարման տվյալների բազան, տեղեկատվություն է հավաքվել քաղաքի շենքերի և տրանսպորտային համակարգերի, հեռահաղորդակցությունների մասին:-0-
