Ողջ աշխարհի հայ ոսկեգործները Փարիզում քննարկել են ոլորտի զարգացման հեռանկարները

ԵՐԵՎԱՆ, 8 նոյեմբերի. /Նովոստի-Արմենիա/. Հայ ոսկեգործների միությունը ներկայացրել է կատարված աշխատանքն, ինչպես նաև Հայաստանում ոսկերչության զարգացման առաջիկա ծրագրերը Փարիզում կայացած տարեկան հավաքի ժամանակ, հաղորդում է ՀՀ ԱԳՆ մամուլի ծառայությունը:

Նախորդ շաբաթ օրը տեղի ունեցած միջոցառման ընթացքում Ֆրանսիայում ՀՀ դեսպան Վիգեն Չիտեչյանն ընդգծել է, որ Հայաստանի նախագահը և կառավարությունը մեծ կարևորություն են տալիս երկրում ոսկերչության զարգացմանը և գործնական քայլեր են ձեռնարկել այդ ոլորտի դիմանիկ զարգացումն ապահովելու համար:

Նա նաև շնորհակալություն է հայտնել միությանը Հայաստանում ոսկերչության զարգացմանն աջակցելու համար:

Հավաքին մասնակցել են Միության նախագահ Գագիկ Գևորգյանը, Եվրոպայի մասնաճյուղի նախագահ Հովել Շնորհոկյանը, աշխարհի տարբեր երկրները ներկայացնող հայ ոսկեգործներ և ադամանդագործներ, ֆրանսահայ համայնքի ներկայացուցիչներ:

Միջոցառումն անցկացվել է ՀՀ սփյուռքի նախարար Հրանուշ Հակոբյանի և Ֆրանսիայում ՀՀ դեսպան Վիգեն Չիտեչյանի հովանու ներքո:

Հայ ոսկեգործների միությունը ստեղծվել է 1995թ-ին: Նպատակն է համախմբել աշխարհի տարբեր երկրներում գործող հայ ոսկեգործներին և  ադամանդագործներին` նպաստելու համար Հայաստանում ոսկերչության, ադամանդագործության, ժամագործության ոլորտների զարգացմանը և փոխադարձ կապերի ստեղծմանը: Ներկայում Միության անդամ են Եվրոպայի, Ասիայի, Ամերիկայի և Ավստրալիայի ավելի քան 30 հայ ոսկեգործներ:  -0-