ՀՀ առողջապահության նախարարության ղեկավարն արձանագրում է ոլորտում առկա կոռուպցիայի մակարդակի կրճատումը

ԵՐԵՎԱՆ, 7 նոյեմբերի. /Նովոստի-Արմենիա/. ՀՀ առողջապահության նախարար Հարություն Քուշկյանը կարծում է, որ համակարգում կոռուպցիան կրճատման միտումներ ունի:

«Կան անցանկալի երևույթներ և միտումներ, որոնք ձևավորվել են տասնամյակների ընթացքում, այդ թվում՝ ֆինանսական և բժշկական տեսանկյունից, որոնք մենք քայլ առ քայլ վերացնում ենք ոլորտից»,- երկուշաբթի խորհրդարանի բյուջետային լսումներից հետո լրագրողներին ասաց նա:
Այդ կապակցությամբ Քուշկյանն արձանագրեց, որ «ստվերային» երևույթները կրճատվում են, իսկ պետական հատկացումներն ավելանում են, որպեսզի ոլորտի աշխատակիցներին հեռու պահեն ստվերային երևույթներից:

Այդ համատեքստում նա տեղեկացրեց, որ եթե մեկ տարի առաջ «Շտապօգնություն» համակարգի աշխատակիցների միջին աշխատավարձը կազմում էր 40 հազար դրամ (շուրջ 105 դոլար), ապա այժմ այն բարձրացվել է մինչև 140 հազար դրամ (շուրջ 380 դոլար): 

Ըստ նախարարի, անշուշտ, կոռուպցիոն երևույթների կտրուկ նվազումը չափազանց ցանկալի կլիներ, սակայն նույն ժամանակ դա բավական բարդ է: «Երեք-չորս տարիների ընթացքում մեր բոլոր բարեփոխումները նաև նման երևույթների կրճատմանն են ուղղված»,- ասաց նա:

Քուշկյանը նաև անդրադարձավ հանրապետության մարզերի պրոֆեսիոնալ բժշկական կադրերի՝ հատկապես նեղ մասնագիտությունների գծով մասնագետների պակասին: «Մեզ մոտ հատուկ ծրագիր է անցկացվում, որի շրջանակներում մարզերում այդ բացթողումն աստիճանաբար կվերացվի»,- ասաց նա՝ պարզաբանելով, որ պրոֆեսիոնալ բժիշկները հանրապետության մարզերում երկարաժամկետ գործուղման կուղևորվեն:
2012թ.-ի պետական բյուջեի նախագծում առողջապահության ոլորտի ծախսերը նախատեսված են 65,9 մլրդ դրամի (մոտ 173,7 մլն դրամ) չափով: Այդ գումարի շուրջ 80 տոկոսը՝ ավելի քան 51 մլրդ դրամը (շուրջ 134 մլն դոլար) ծախսվելու են պետպատվերի շրջանակներում իրականացվող ծրագրերով: -0-