Ազգային անվտանգության խորհրդի քարտուղար Արթուր Բաղդասարյանի հետ հանդիպման ժամանակ Հայաստանում ԱՄՆ դեսպան Ջոն Հեֆերնը բարձր է գնահատել Հայաստանի կողմից տրամադրված օգնությունը Թուրքիային՝ վերջերս տեղի ունեցած երկրաշարժից հետո, հաղորդում է ՀՀ ԱԽ մամուլի ծառայությունը:
«Հեֆերն այն որպես հարևան երկրի նկատմամբ բարի կամեցողության դրսևորում է գնահատել»,- ասվում է հաղորդագրության մեջ:
Հայաստանից ԻԼ-76 օդանավը Էրզրում է տեղափոխել 40 տոննա բեռ՝ 100-ից ավելի վրաններ, 500 քնապարկ և 7000-ից ավելի անկողնային պարագաներ:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:
Ջոն Հեֆերը նշել է, որ ԱՄՆ-ը հետևողականորեն շարունակելու է տարածաշրջանի կայուն զարգացմանը և գործընկերային հարաբերությունների հաստատմանն ուղղված իր ջանքերը:
Հաղորդագրության համաձայն՝ դեսպանն իր գոհունակությունն է հայտնել Հայաստանում տարբեր ոլորտներում իրականացվող բարեփոխումների կապակցությամբ` հատկապես կարևորելով սահմանային անվտանգության ապահովման և սահմանային ենթակառուցվածքների արդիականացման գործընթացը:
ԱԱԽ քարտուղարը դեսպանին մաղթել է բեղմնավոր աշխատանք և հույս հայտնել, որ դեսպանի պաշտոնավարման ընթացքում Հայաստանի և ԱՄՆ-ի միջև հարաբերությունների բարձր մակարդակը կպահպանվի:
Սեպտեմբերի 27-ին Ամերիկյան Սենատը միաձայն հաստատել է Հայաստանում ԱՄՆ նոր դեսպանի պաշտոնում Ջոն Հեֆերնի թեկնածությունը: -0-
