ԵՐԵՎԱՆ, 1 նոյեմբերի. /Նովոստի-Արմենիա/. ՀՀ նախագահ Սերժ Սարգսյանը կառավարությանն առընթեր ոստիկանության ղեկավար կազմին է ներկայացրել ոստիկանության նորանշանակ պետ Վլադիմիր Գասպարյանին, հաղորդում է պետության ղեկավարի մամուլի ծառայությունը:
ՀՀ նախագահ Սերժ Սարգսյանը երեքշաբթի հրամանագիր է ստորագրել գեներալ-լեյտենանտ Վլադիմիր Գասպարյանին ՀՀ ոստիկանապետ նշանակելու մասին՝ ազատելով նրան ՀՀ պաշտպանության փոխնախարարի պաշտոնից: Ավելի վաղ նախագահը պաշտոնից ազատել էր ՀՀ ոստիկանապետ Ալիկ Սարգսյանին և նշանակել նրան ՀՀ նախագահի խորհրդականի պաշտոնում:
«Հանրապետության ղեկավարը նշել է, որ Ալիկ Սարգսյանը կատարել է իր առջև դրված խնդիրները, որի համար նախագահը նրան շնորհակալություն է հայտնել և ներկաներին տեղեկացրել, որ Ալիկ Սարգսյանը նշանակվել է նախագահի խորհրդական»,- նշվում է հաղորդագրության մեջ:
Նոր ոստիկանապետի նշանակման կապակցությամբ Սերժ Սարգսյանն ընդգծել է, որ իր համոզմամբ՝ այսօր ՀՀ ոստիկանությունը կարիք ունի Վլադիմիր Գասպարյանի տիպի ղեկավարի:
Նախագահը վստահություն է հայտնել, որ ոստիկանությունում բարեփոխումները շարունակվելու են, և ժողովուրդն իրեն ավելի պաշտպանված է զգալու:
Ալիկ Սարգսյանը շնորհակալություն է հայտնել իր պաշտոնավարման ամբողջ ժամանակահատվածում ոստիկանության համակարգի և իր նկատմամբ ցուցաբերված վստահության և աջակցության համար:
Նա շնորհավորել է նորանշանակ ոստիկանապետին, ցանկացել բեղմնավոր աշխատանք:
Վլադիմիր Գասպարյանը վստահեցրել է, որ համակարգում մեկնարկած բարեփոխումները կարճ ժամանակահատվածում կհասցվեն իրենց տրամաբանական ավարտին, առաջ քաշված խնդիրները պատշաճ կերպով կլուծվեն, որի արդյունքը կլինի հասարակության մեջ օրենքի գերակայության ամրապնդումը: -0-
