ԵՐԵՎԱՆ, 1 նոյեմբերի. /Նովոստի-Արմենիա/. Հայաստանի պետական կառույցներում գրանցված վերջին հրաժարականները կապված են իշխող կոալիցիայի նախընտրական քաղաքականության հետ, կարծում է «Նոր ժամանակներ» ընդդիմադիր կուսակցության առաջնորդ Արամ Կարապետյանը:
Ներկայիս քաղաքապետ Կարեն Կարապետյանը հոկտեմբերի 28-ին հրաժարական է ներկայացրել, որը բացատրել է այլ աշխատանքի անցնելով և անձնական պատճառներով: Երեքշաբթի իր հրաժարականն է հաստատել ՀՀ ոստիկանապետ Ալիկ Սարգսյանը: Սպասվում են նոր հրաժարականներ:
«Կարծում եմ, որ այս գործընթացները բավականին օրինաչափ են: Հայաստանը նախընտրական փուլ է թևակոխում, և պարզ է, որ իշխանություններն ամեն ինչ կենտրոնացնում են, որպեսզի հստակ և արդյունավետ կերպով կարողանան անցնել այս փուլը: Կարծում եմ, որ առաջիկայում հրաժարականների հետ կապված բոլոր հարցերը կվերաբերեն իշխանական ռեսուրսների ամրապնդման գործընթացին», - երեքշաբթի մամուլի ասուլիսի ժամանակ ասաց Կարապետյանը:
Նա նաև բացառեց այն բանի հնարավորությունը, որ պետական հրաժարականները որևէ կերպ կարող են կապված լինել ՀՀ երկրորդ նախագահ Ռոբերտ Քոչարյանի և գործող նախագահ Սերժ Սարգսյանի միջև իբր լարված հարաբերությունների հետ:
«Նոր ժամանակներ» կուսակցության առաջնորդը հայտարարեց, որ կոալիցիայի նախընտրական գործողությունները նման բնույթ են կրում այն պատճառով, որ հայկական կոալիցիան ավելի շուտ բյուրոկրատական, քան գաղափարախոսական կառույց է:
ՀՀԿ խորհրդարանական խմբակցության անդամ Արտակ Դավթյանն իր հերթին նշեց, որ նախընտրական ժամանակահատվածում նման իրադարձությունները հասարակության կողմից ավելի սուր են ընկալվում, քան սովորական ժամանակներում:
Ինչ վերաբերում է վերջին հրաժարականներին, ապա Դավթյանը հայտարարեց, որ սեփական դիմումի համաձայն հրաժարական տված անձինք արդեն ներկայացրել են իրենց մեկնաբանությունները:
Նա նաև նշեց, որ հարգանքով է վերաբերվել Կարեն Կարապետյանի հայտարարությանը՝ ընդգծելով, որ Երևանի քաղաքապետը «երկար ուղի է անցել և այնպիսի աշխատանքային և կրթական ցենզ ունի, որ որտեղ էլ որ աշխատի, նրա գործունեությունը առավելագույնս հայամետ և հայրենասիրական է լինելու»:
Ինչ վերաբերում է կոալիցիայի գաղափարախոսական բաղկացուցչին, ապա Դավթյանը բնական համարեց այն փաստը, որ կոալիցիան բաղկացած է տարբեր կուսակցություններից, որոնցից յուրաքանչյուրն ունի իր գաղափարախոսությունը:
Հայաստանի խորհրդարանական ընտրությունները տեղի կունենան 2012 թ.-ի գարնանը:-0-
