ՀՀ ոստիկանության պետ Ալիկ Սարգսյանը հինգշաբթի լրագրողներին հայտնեց, որ թույլ չի տա կառավարության անդամների հասցեին ուղղված վիրավորանքներ և պատրաստ է պատժամիջոցներ կիրառել կառավարության շենքի առջև հավաքված բողոքի ակցիայի մասնակիցների նկատմամբ:
Ոստիկանական շարասյունը փակել է դեպի շենք տանող բոլոր մուտքերը և չի թողնում հետիոտներին անցնել այդտեղով: Ավանդաբար հինգշաբթի օրերին կառավարության շենքի մոտ հավաքվում են Հայաստանի քաղաքացիներ և բողոքի ակցիաներ են անցկացնում: Անցած շաբաթ բողոքի ակցիայի ժամանակ մասնակիցներից մեկը կառավարության անդամների հասցեին անպարկեշտ արտահայտություններ թույլ տալու հետևանքով Ոստիկանություն է տեղափոխվել:
«Դեպի կառավարության շենք տանող մուտքերը փակվել են իմ հանձնարարությամբ, և եթե ցուցարարները շարունակեն ակցիան, ապա մենք կարող ենք նրանց նկատմամբ նաև այլ միջոցներ կիրառել: Դա նրանց շահերից ելնելով է արվում, քանի որ հակառակ դեպքում, նախորդ միջադեպի կրկնվելու դեպքում, նրանց նկատմամբ այլ միջոցներ կձեռնարկվեն»,- ասաց Սարգսյանը:
Նա նշեց, որ որպես Ոստիկանության պետ՝ չպետք է թույլ տա մարդկանց վիրավորեն, իսկ ինչ վերաբերում է մարդու իրավունքների պաշտպանության հարցին, ապա «կառավարության անդամները նույնպես մարդիկ են և նրանց իրավունքները նույնպես անհրաժեշտ է պաշտպանել և անձնական վիրավորանքներ թույլ չտալ»:
Ըստ Սարգսյանի՝ օրենսդրության համաձայն՝ եթե բողոքի ակցիայի ընթացքում դրա մասնակիցները փորձում են վիրավորանքներ հասցնել կամ հակահասարակական գործողությունների են անցնում, ապա ոստիկանությունը պարտավոր է նրանց զգուշացնել, որ պահանջները չկատարելու դեպքում կարող է ուժ գործադրել նրանց դուրս մղելու ուղղությամբ, իսկ դիմադրելու դեպքում՝ պարտադրանքի դիմել, այդ թվում՝ հատուկ միջոցների կիրառմամբ:
«Իրադարձության նման զարգացումները բացառելու համար ես նպատակահարմար գտա այսօր պարսպապատել կառավարության շենքի դիմացի տարածքը և այդպիսով կանխել այն, ինչն այսօր սպասվում էր, որպեսզի խուսափենք այլ հետևանքներից»,- ասաց Սարգսյանը:
Ըստ նրա՝ եթե այսօր իրավիճակը կրկնվեր, ապա նրա հանձնարարությամբ ակցիայի մասնակիցները Ոստիկանություն կտեղափոխվեին և նրանց նկատմամբ վարչական արձանագրություններ կկազմվեին:
«Ոստիկանության գործողություններն իրականացվում են իմ հանձնարարությամբ և լիովին օրինական են: Միաժամանակ ես խորհուրդ եմ տալիս չհավաքվել կառավարության շենքի դիմաց, եթե ակցիան և այդ անձանց գործողությունները խաղաղ բնույթ չեն կրելու և լինելու են վիրավորանքներ»,- ասաց Սարգսյանը:
Նա նաև նշեց, որ ոստիկանության աշխատակիցներն ակցիայի մասնակիցների հետ բացատրական աշխատանքներ են տանում, «որպեսզի նրանք քաղաքակիրթ ձևով ներկայացնեն իրենց խնդիրները»:
Միաժամանակ նա չբացառեց, որ հաջորդ հինգշաբթի ակցիայի մասնակիցներին կրկին կթույլատրվի ակցիա անցկացնել կառավարության շենքի մոտ, ինչը կախված է նրանց հետ բացատրական աշխատանքների անցկացման արդյունքներից:
Այն դեպքում, եթե ակցիայի մասնակիցները եզրակացություններ չանեն, Ոստիկանության պետը լրագրողներին «շատ հետաքրքիր հինգշաբթի» խոստացավ:
«Ես չեմ պատրաստվում անգործ մնալ և ձեռքերս ծալած չեմ նստի, ես պաշտպանելու եմ ինչպես պետական ծառայողների, այնպես էլ շարքային քաղաքացիների շահերը, բայց այլևս վիրավորանքներ թույլ չեմ տա»,- ասաց Սարգսյանը:
Նա նշեց, որ անձամբ ինքը միշտ փորձել է ակցիայի մասնակիցների հետ քննարկել խնդիրները՝ հասկանալով, որ մարդիկ բազմաթիվ խնդիրներ, պահաջներ, առաջարկներ, բողոքներ ունեն, սակայն վերջին միջադեպը ցույց տվեց, որ դրա մասնակիցների մոտ անգամ մի փոքր ողջախոհություն չի մնացել և այդ ամենը հիստերիայի է վերածվել: -0-
