«Բարգավաճ Հայաստանը» խորհրդարանական ընտրություններում առաջ անցնելու բավարար ընտրազանգված ունի. փորձագետ

«Բարգավաճ Հայաստան» կուսակցությունը (ԲՀԿ) հզոր ռեսուրսներ, բավարար ընտրազանգված, ինչպես նաև բավականին իրական հնարավորություններ ունի խորհրդարանական հաջորդ ընտրություններում առաջ անցնելու համար, կարծում է քաղաքական և ընտրական տեխնոլոգիաների մասնագետ Արմեն Բադալյանը:

Հայաստանի Ազգային ժողովի հերթական ընտրությունները կանցկացվեն 2012 թվականին:

«ԲՀԿ առաջնորդ Գագիկ Ծառուկյանը բավարար հեղինակություն և ռեսուրսներ ունի՝ իր հետևից տանելու համար այն ընտրողներին, ովքեր կհավատան, որ նա կարող է բարելավել Հայաստանի դրությունը»,- հայտարարեց Բադալյանը:

Նա կարևորեց նաև Հայաստանի նախկին նախագահ Ռոբերտ Քոչարյանի կողմից «Բարգավաճ Հայաստան» կուսակցությանը ցուցաբերվելիք հնարավոր օժանդակության գործոնը: «Մենք չենք կարող բացառել Ռոբերտ Քոչարյանի վերադարձը քաղաքականություն, և, հավանական է, որ նա կսատարի Ծառուկյանի կուսակցությանը»,- կարծում է Բադալյանը:

Կառավարման փորձագետ Հարություն Մեսրոպյանն իր հերթին նշեց, որ չի հավատում երկրի իշխանափոխությանը, սակայն նույնիսկ այդ դեպքում հայկական իրականության մեջ էական ոչինչ տեղի չի ունենա:

«Մենք տեսնում ենք 90-ականների քաղաքականության սահուն շարունակություն, և առաջնորդի փոփոխությունից ոչինչ չի փոխվի, քանի որ այդ մարդիկ նույն գաղափարախոսության կրողներն են: Քաղաքական նոր կյանք սկսելու համար մեզ պետք է մաքրել ներքաղաքական ասպարեզը և իշխանության բերել նոր մարդկանց, ովքեր կգործեն պետության շահերից ելնելով»,- ընդգծեց Մեսրոպյանը:

Նա նշեց նաև, որ խորհրդարանական ընտրությունների ելքը կանխագուշակել այդքան էլ դժվար չի լինի: «Մեզ մոտ ընդամենը իշխանական համակարգի տեղի պայքար է, բայց իշխանափոխությունից ժողովուրդը ծանրակշիռ փոփոխություններ չի տեսնի»,- կարծում է Մեսրոպյանը:

«Բարգավաճ Հայաստան» կուսակցությունն ազատական թեքումով չափավոր կենտրոնամետ քաղաքական ուժ է, որը ստեղծվել է 2004 թվականին: Կուսակցության նախագահը խորհրդարանի պատգամավոր, Ազգային Օլիմպիական կոմիտեի ղեկավար,  Multy Group կոնցեռնի նախագահ Գագիկ Ծառուկյանն է:

ԲՀԿ-ն Հայաստանի Հանրապետական կուսակցության և «Օրինաց Երկիր» կուսակցության հետ կազմում է երկրի իշխող կոալիցիան:

«Բարգավաճ Հայաստանը» երկրի կառավարությունում ներկայացված է չորս նախարարներով՝ առողջապահության, աշխատանքի և սոցիալական հարցերի, քաղաքաշինության, սպորտի և երիտասարդության հարցերի, խորհրդարանական խմբակցությունում ընդգրկված են 26 պատգամավորներ: Կուսակցությունում ամրագրված է նաև խորհրդարանի փոխխոսնակի պաշտոնը: -0-