Մոնակոյում ՀՀ դեսպանատան բացումը խթան կհանդիսանա երկու երկրների միջև համագործակցության համար. Իշխան

Մոնակոյում ՀՀ դեսպանատան բացումը խթան կհանդիսանա երկու երկրների միջև երկկողմ հարաբերությունների զարգացման համար, ՀՀ առաջին դեսպան Վիգեն Չիտեչյանից հավատարմագրերն ընդունելու ժամանակ հայտնել է Մոնակոյի Իշխան Ալբերտ Երկրորդը:

Ինչպես հաղորդում է հայկական ԱԳՆ մամուլի ծառայությունը, իշխանը շնորհավորել է առաջին դեսպանին հավատարմագրման կապակցությամբ:

ՀՀ դեսպանը կարևորել է Մոնակոյի Իշխանության հետ Հայաստանի երկկողմ հարաբերությունների զարգացումը, ինչպես նաև համագործակցությունը այնպիսի միջազգային կազմակերպությունների շրջանակներում, ինչպիսիք են ՄԱԿ-ը, ՅՈՒՆԵՍԿՕ-ն, Եվրոպայի Խորհուրդը, Ֆրանկոֆոնիայի Միջազգային կազմակերպությունը:

Դեսպանը նաև Մոնակոյի Իշխանին շնորհավորել է վերջինիս հովանավորությամբ Մոնակոյում ամեն տարի անցկացվող «Սպորտը հանուն խաղաղությանն» միջազգային ֆորումի հաջողության կապակցությամբ` բարձր գնահատելով այդ հաստատության ջանքերը աշխարհում խաղաղության և կայունության ամրապնդման գործում:

Բացի այդ, նույն օրը դեսպան Չիտեչյանը հանդիպում է ունեցել Մոնակոյի Կառավարության Արտաքին գործերի խորհրդական Ժոզե Բադիայի հետ:   -0-