«Արևորդի» բնապահպանական երրորդ փառատոնը կանցկացվի հոկտեմբերի 14-18-ը Երևանում

«Արևորդի» միջազգային բնապահպանական երրորդ փառատոնը կանցկացվի հոկտեմբերի 14-18-ը Երևանում, հինգշաբթի մամուլի ասուլիսի ժամանակ ասաց «Արևորդի» փառատոնի տնօրեն, Երևանի կենդանաբանական այգու տնօրեն Ռուբեն Խաչատրյանը:

«Փառատոնը կազմակերպվում է երկու տարին մեկ անգամ: Այս տարի այն անց է կացվում «Քո հետքը բնության մեջ» խորագրի ներքո և նվիրված է վայրի բնության պաշտպանությանը»,- ասաց Խաչատրյանը, ավելացնելով, որ «Արևորդին» Հարավային Կովկասում միակն է իր տեսակի մեջ:

Նա հայնտեց, որ փառատոնի մեկնարկը կնշանավորվի կենդանիների դիմակներով երիտասարդների երթով՝ թափոններից պատրաստված կենդանիների հագուստներով ավելի քան 500 երիտասարդներ կանցնեն Երևանի փողոցներով՝ կոչ անելով անցորդներին մասնակցել ծրագրված միջոցառումներին:

Ինչպես նշեց Խաչատրյանը, փառատոնի շրջանակներում նախատեսված է աշխարհի 30 երկրներից 70 լավագույն վավերագրական ֆիլմերի ցուցադրությունը: Ֆիլմերը հնարավոր կլինի դիտել 11 հայկական կինոդահլիճներում, մուտքը հիմնականում ազատ կլինի:

Կանցկացվեն նաև վայրի ֆլորայի և ֆաունայի լուսանկարների երեք ցուցահանդեսներ, ընդ որում՝ մրցույթի արդյունքում ընտրված լավագույն լուսանկարների հեղինակնրը հատուկ պարգևներ կստանան:

Մամուլի ասուլիսի ժամանակ փառատոնի գլխավոր հովանավոր ՎիվաՍել բջջային կապի ընկերության գլխավոր տնօրեն Ռալֆ Յիրիկյանը կոչ արեց հոգ տանել բնության համար, գնահատել այն հարստությունը, որ բնությունը  տալիս է մարդկանց:

«Փառատոնի նպատակն է՝ ուշադրություն հրավիրել վայրի բնության պահպանության հարցին և բնապահպանական խնդիրներին, ինչպես նաև բարձրացնել այդ հարցերի վերաբերյալ հանրության և հատկապես երիտասարդության իրազեկության մակարդակը»,- ասաց նա:

Որպես պատվավոր հյուր Երևան է հրավիրվել ֆրանսիացի հայտնի վավերագրող Պատրիք Ռուսելը, ում «Green» ֆիլմը կբացի փառատոնի ծրագիրը: 48 րոպեանոց համր ֆիլմը հեղինակավոր մրցանակների դափնեկիր է, որոնց թվում է՝ Wildscreen խոշոր էկոլոգիական փառատոնի «Ոսկե պանդան»:

Փառատոնն անցկացվում է ՀՀ վայրի բնության և մշակութային արժեքների պահպանման հիմնադրամի (FPWC) նախաձեռնությամբ: -0-