Հայաստանը դարձել է Օպտիկայի հարցերով միջազգային հանձնաժողովի լիիրավ անդամ

ԵՐԵՎԱՆ, 11 հոկտեմբերի. /Նովոստի-Արմենիա/. Հայաստանը դարձել է Օպտիկայի հարցերով միջազգային հանձնաժողովի լիիրավ անդամ, Երևանում կայացած «Լազերային ֆիզիկա 2011» միջազգային գիտաժողովի  ընթացքում հայտարարել է Օպտիկայի հարցերով միջազգային հանձնաժողովի քարտուղար Անժելա Գուսմանը:

Օպտիկայի հարցերով միջազգային հանձնաժողովը (Ֆլորիդայի համալսարան, ԱՄՆ)  Մաքուր և կիրառական ֆիզիկայի միջազգային գիտական խորհրդի կառուցվածքային ստորաբաժանումն է և Մաքուր ու կիրառական ֆիզիկայի միջազգային միության մասնաճյուղը, որը միավորում է 54 երկրներ և ներառում է 6 միջազգային գիտական միություններ՝ ОSА-ն (Ամերիկյան օպտիկական միություն), SPIE-ն (Ինժեներ-օպտիկների միջազգային միություն), Բիոբժշկական օպտիկայի միջազգային միությունը, EOS-ը (Եվրոպական օպտիկական միություն):

Ինչպես հաղորդում է ՀՀ ԳԱԱ տեղեկատվական կենտրոնը, ԳԱԱ ֆիզիկական հետազոտությունների ինստիտուտում երեքշաբթի մեկնարկած գիտաժողովի ընթացքում ողջույնի խոսքով հանդես է եկել ֆիզիկայի գծով նոբելյան մրցանակի դափնեկիր, Ռուսաստանի գիտությունների ակադեմիայի փոխնախագահ, Պետդումայի պատգամավոր Ժորես Ալֆերովը:

Գիտաժողովը կտևի մինչև հոկտեմբերի 14-ը:-0-