ԵՐԵՎԱՆ, 7 հոկտեմբերի. /Նովոստի-Արմենիա/. Երիտասարդ հայ ֆուտբոլասերներն ուրբաթ երթ են կազմակերպել Եվրո-2012 ընտրական փուլի շրջանակներում Մակեդոնիայի հավաքականի հետ խաղից առաջ:
Ինչպես «Նովոստի-Արմենիա» գործակալությանը հայտնեց ազգային հավաքականի երկրպագու Նորայր Դունամալյանը, երթի կազմակերպիչը «Առաջին հայկական ճակատ» (First Armenian Front - FAF) երիտասարդական նախաձեռնող խումբն է, որը ձևավորվել է Ռուսաստանի հավաքականի հետ Հայաստանի խաղից առաջ:
Դունամալյանը հայտնեց, որ սա նախաձեռնող խմբի երկրորդ երթն է:
Նրա խոսքով՝ FAF խումբն իր էջն ունի Facebook սոցիալական ցանցում, որի միջոցով հրավերներ է ուղարկել մասնակիցներին:
Ֆուտբոլասերները հավաքվել են աշխարհահռչակ կոմպոզիտոր Արամ Խաչատրյանի արձանի մոտ: Ակտիվիստների դեմքերը ներկված են հայկական եռագույնի գույներով, Հայաստանի հավաքականին երկրպագող աղջիկների մազերը՝ զարդարված եռագույն ժապավեններով:
Փաթաթված Հայաստանի դրոշով՝ երթի մասնակիցները երգել են հանրապետության օրհներգը և պարել «Քոչարի»:
Բարձր տրամադրությամբ խումբն ուղևորվել է դեպի Հանրապետական մարզադաշտ Հյուսիսային պողոտայով, Հանրապետության հրապարակով, «Վերնիսաժի», Վարդան Մամիկոնյանի արձանի մոտով:
Հայաստանի ֆուտբոլի հավաքականը երրորդ տեղն է զբաղեցնում Եվրո-2012 «В» ընտրական խմբում՝ 4:0 հաշվով սլովակների հանդեպ տարած սենսացիոն հաղթանակից հետո՝ պահպանելով մրցաշարի եզրափակիչ դուրս գալու իրական հնարավորությունները:
Հայ ֆուտբոլիստները 14 միավոր են հավաքել և մեկ միավորով զիջում են երկրորդ տեղը զբաղեցրած իռլանդացիներին։ 17 միավորով խմբի միանձնյա առաջատարը ռուսներն են:
Սլովակները նույնպես 14 միավոր ունեն, բայց նրանք զիջում են հայ ֆուտբոլիստներին անմիջական հանդիպումների արդյունքներով:
Մակեդոնացիներն Անդորրայի նկատմամբ նվազագույն 1:0 հաշվով տարած այսօրվա հաղթանակից հետո 7 միավոր են հավաքել և զբաղեցնում են հինգերորդ տեղը։ Անդորրացիները, տանուլ տալով իրենց բոլոր հանդիպումները, փակում են մրցաշարային աղյուսակը։ Բոլոր թիմերն ութական հանդիպում են ունեցել։ .
Միաժամանակ հայ ֆուտբոլիստները խփած և բաց թողած գնդակների լավագույն տարբերությունն ունեն՝ -17-7: -0-
