Պերմի երկրամասը պատրաստ է մշակութային ոլորտում Հայաստանի հետ շփման հարթակ դառնալ. փոխմարզպետ

ԵՐԵՎԱՆ, 6 հոկտեմբերի. /Նովոստի-Արմենիա/. Պերմի երկրամասը պատրաստ է մշակութային ոլորտում Հայաստանի հետ շփման հարթակ դառնալ, հինգշաբթի Երևանում կայացած մամուլի ասուլիսում հայտարարեց Պերմի երկրամասի փոխմարզպետ Բորիս Միլգրամը:

Միլգրամը և «Պերմի սպիտակ գիշերներ» փառատոնի նախագահ Վերոնիկա Վայսմանը Երևանում են HighFest թատերական փառատոնի ղեկավարության հրավերով: Այցի շրջանակներում նրանք կհանդիպեն Հայաստանի մշակույթի նախարար Հասմիկ Պողոսյանի հետ և կքննարկեն համագործակցության հնարավորությունները:

«Ինչի՞ մասին կարելի է խոսել նախարարի հետ: Դե, իհարկե, փոխադարձ հետաքրքրություն ներկայացնող գործընթացների: Առաջինը, ինչն աչքի է ընկնում, էքսպերիմենտալ արվեստի մեր ունեցած մեծ խնդիրներն են, իսկ դուք էլ, հավանաբար, ձեր խնդիրներն ունեք... Մենք ունենք դիզայնի կենտրոն, որն արդյունավետ է աշխատում: Մենք կարող ենք նախագծեր փոխանակել»,- ասել է Միլգրամը:
 
Նա ընդգծեց, որ Պերմում, ինչպես Ռուսաստանի բազմաթիվ այլ մարզերում, բավականին մեծ հայկական համայնք կա, որը կարևորագույն ներդրում ունի մշակույթի և արհեստների զարգացման գործում:
 
Փոխմարզպետը հայտարարեց, որ ներկայում Պերմի երկրամասն ակտիվորեն փորձում է միանալ ԵՄ-ի «Եվրոպայի մշակութային մայրաքաղաքներ» մշակութային ծրագրին:
 
Նա կիսվեց նաև Հայաստանի մասին իր տպավորություններով, որտեղ այցելել է առաջին անգամ: Հատկապես փոխմարզպետի հիացմունքին են արժանացել երևանյան քանդակներն իրենց յուրահատկությամբ և գեղեցկությամբ: «Դրանք «բարի նախանձ» են առաջացնում»,- խոստովանեց Միլգրամը:
 
«Պերմի սպիտակ գիշերներ» փառատոնի նախագահ Վերոնիկա Վայսմանն իր հերթին նշեց, որ մշակույթը հրաշալի միջոց է նաև քաղաքական, առևտրական կապերի և շփումների զարգացման համար:
 
Նա պատմեց, որ քննարկել է Հայաստանի հետ համագործակցության հնարավորությունները ոչ միայն մշակույթի, այլ նաև զբոսաշրջության ոլորտում հայկական մի քանի տուրօպերատորների հետ, սակայն դժգոհեց այն փաստից, որ ռուսական ծայրամասերում հյուրանոցային ծառայությունները հաճախ ավելի թանկ են, քան խոշոր քաղաքներում: