Ֆրանսիացի երգչուհի Էլոդի Ֆրեժեն համերգով կունենա Երևանում՝ ՀՀ անկախության 20-ամյակի կապակցությամբ

Ֆրանսիացի երգչուհի Էլոդի Ֆրեժեն (Elodie Frege) յուրահատուկ համերգ կներկայացնի Երևանի բնակիչներին՝ ՀՀ անկախության 20-ամյակի կապակցությամբ, երեքշաբթի հայ-ֆրանսիական բիզնես ակումբի բացման առթիվ անցկացված միջոցառման ընթացքում հայտնել է  Հայաստանում Ֆրանսիայի արտակարգ և լիազոր դեսպան Անրի Ռենոն: Համերգը տեղի կունենա հոկտեմբերի 5-ին՝ ժամը 20:00-ին, Երևանի «Գաֆեսչյան» արվեստի կենտրոնի տարածքում և բաց կլինի բոլոր ցանկացողների համար:

«Համերգի ժամանակ կհնչեն ինչպես երիտասարդ, այնպես էլ արդեն հայտնի կոմպոզիտորների հայտնի ֆրանսիական երգեր: Միջոցառումը նվեր կդառնա Երևանի ողջ բնակչության համար՝ Ֆրանսիայի նախագահ Նիկոլա Սարկոզիի Հայաստան կայանալիք պետական այցի նախաշեմին»,- ասել է դեսպանը:

Բացի ֆրանսիացի երգչուհուց, համերգին կմասնակցեն հայկական էստրադայի աստղերը և Հանրային հեռուստաընկերության և ռադիոյի սիմֆոնիկ նվագախումբը, ովքեր 20 հիթեր կկատարեն անկախության 20-ամյակի պատվին:

Էլոդի Ֆրեժեն ֆրանսիացի երգչուհի է, երգերի երաժշտության և բառերի հեղինակ: Նա ֆրանսիական երրորդ Star Academy-ի հաղթողն է:

2011թ.-ի սեպտեմբերին Հայաստանում Ֆրանսիայի դեսպանատան աջակցությամբ ստեղծված բիզնես ակումբի հիմնադիրն է ֆրանսիացի և հայ գործարարների խումբը: 

Հիմնադիրների թվում են՝ Արման Ֆինարբասին (Grand Thornton), Ստեփան Գիշյանը (Ակբա-Կրեդիտ Ագրիկոլ Բանկ), Պատրիկ Լորենը («Հայջրմուղկոյուղի»), Բրունո Դյութուան (Օrange Armenia), Ստեփան Բարաքյանը (Վերիտաս գրասենյակ), Ֆրեդ Դավլաթը (Մայրենի լեզու), Դիդիե Գիոնեն (Բաղդասարով Կրիստալ Գրուպ):

Հայ-ֆրանսիական բիզնես ակումբը, մասնավորապես, ֆրանսիական մասնակցությամբ ձեռնարկությունների ներկայացուցիչների հանդիպման վայր է: Ակումբում թեմատիկ հանդիպումներ, միջոցառումներ, զարգացման ծրագրեր կանցկացվեն:

Ակումբի առաքելությունն է ֆրանսիական բիզնես հանրության դիրքերի, առևտրատնտեսական հարաբերությունների, Հայաստանի և Ֆրանսիայի միջև գիտատեխնիկական փոխանակմանն աջակցելը և ամրապնդելը: -0-