ԵՐԵՎԱՆ, 29 սեպտեմբերի. /Նովոստի-Արմենիա/. Հանցավոր խումբը, որը վնասազերծվեց Երևանի հյուսիսային հատվածում սեպտեմբերի 23-ի վաղ առավոտյան, այն նույն հանցախումբն է, որը հարձակումներ է կատարել պաշտոնյաների տների վրա, հինգշաբթի լրագրողներին հայտնեց Հայաստանի ոստիկանապետ Ալիկ Սարգսյանը:
Առաջին անգամ Երևանում գործող հանցախմբի գործունեության մասին հայտարարեց Հայաստանի գլխավոր դատախազ Աղվան Հովսեփյանը, ով հրահանգեց նույն ձեռագրով կատարած բոլոր հարձակումների քննությունը միավորել մեկ վարույթում:
«Հանցախմբի բոլոր անդամները քրեական անցյալ ունեն, և նրանցից շատերը դատապարտված են եղել ավազակային հարձակումների համար»,- հայտնեց ոստիկանապետը՝ հավելելով, որ հանցավոր խմբի բոլոր անդամները ձերբակալված են, այդ թվում` դրա պարագլուխներից երկուսը:
Սարգսյանը միաժամանակ հերքեց լուրերն այն մասին, թե հանցախմբի` բերման ենթարկված անձանց թվում բարձրաստիճան պաշտոնյաների զավակներ կան, և խնդրեց լրագրողներին չստուգված տեղեկատվություն չհրապարակել: «Նման տեղեկություն ոստիկանության ոչ մի աշխատակից չի տվել… Նրանք որևէ կապ չունեն ավազակների հանցավոր գործունեության հետ»,- ընդգծեց ոստիկանապետը:
Օպերատիվ տվյալների համաձայն, բանդան ծրագրել է նաև հանցագործություններ, ինչը կասեցվել է ոստիկանության կողմից ձեռնարկած քայլերի արդյունքում:
Կասկածյալներից մեկը, դիմադրություն ցույց տալով ոստիկանության աշխատակիցներին, փախուստի դիմելու ժամանակ ընկել է ժայռից և մահացել:
Ինչպես ավելի վաղ հայտարարել էր Գլխավոր դատախազության մամուլի ծառայությունը, հանցավոր խմբի անդամները զինված դիմադրություն են ցույց տվել ոստիկանության աշխատակիցներին, ինչը հաջողվել է կանխել և վնասազերծել խումբը:
Մեծ քանակությամբ զենք և զինամթերք է հայտնաբերվել և առգրավվել: -0-
