EURONEST-ի Սոցիալական, մշակութային և կրթական հարցերի հանձնաժողովի նիստը կանցկացվի նոյեմբերին Երևանում, հինգշաբթի լրագրողներին հայտնեց «Ժառանգություն» ընդդիմադիր խմբակցության ղեկավար, «Արևելյան գործընկերության» Խորհրդարանական վեհաժողովում (EURONEST) հայկական պատվիրակության ղեկավար Ստեփան Սաֆարյանը:
«Մենք արդյունավետ աշխատանք ենք իրականացրել լիագումար նիստում, և այդ աշխատանքի արդյունքներից մեկն այն փաստն է, որ EURONEST-ի սոցիալական հարցերի հանձնաժողովի հաջորդ նիստը, որի համանախագահը պատգամավոր Արտակ Զաքարյանն է, կանցկացվի Հայաստանում»,- ասաց Ստեփանյանը:
Խորհրդարանական վեհաժողովի (EURONEST) առաջին լիագումար նիստն անցկացվել է սեպտեմբերի 14-15-ը Ստրասբուրգում:
Հայաստանում Եվրահանձնաժողովի պատվիրակության գործերի հավատարմատար Օննո Սիմոնսն իր հերթին հույս հայտնեց, որ առաջիկա նիստին կմասնակցի նաև Ադրբեջանը:
«EURONEST-ի հանձնաժողովներից մեկի հաջորդ նիստը կանցկացվի Բաքվում, և մենք նույնպես հույս ունենք, որ հայկական կողմը կմասնակցի դրա աշխատանքներին»,- ընդգծեց նա:
Euronest-ը միջխորհրդարանական վեհաժողով է, որը ստեղծվել է «Արևելյան գործընկերություն» նախաձեռնության շրջանակներում: Այն միջխորհրդանական ժողով է, որում ընդգրկված են Եվրախորհրդարանի և ծրագրում ներառված երկրների օրենսդրական մարմինների ներկայացուցիչները:
«Արևելյան գործընկերությունը» լեհ-շվեդական նախաձեռնություն է՝ հարևանության քաղաքականության շրջանակներում, որն ուղղված է հետխորհրդային երկրների և ԵՄ-ի միջև հարաբերությունների բարելավմանը։ «Արևելյան գործընկերությունը» պետք է ընդգրկի Եվրամիության վեց հարևան երկրներին՝ Ադրբեջանին, Հայաստանին, Վրաստանին, Մոլդովային, Ուկրաինային և Բելառուսին։ Ծրագրի շրջանակներում ԵՄ-ն այդ երկրներին կհատկացնի 600 միլիոն եվրո 2009-2013 թթ.-ին։--0--
