Երևանի քաղաքապետ Կարեն Կարապետյանը երեքշաբթի շնորհավորել է համաքաղաքացիներին՝ Հայաստանի անկախության 20-րդ տարեդարձի կապակցությամբ, հաղորդում է քաղաքապետարանի մամուլի ծառայությունը:
«20 տարի առաջ մեր ժողովուրդը համախմբվեց հայության դարավոր երազանքի՝ անկախության գաղափարի շուրջ, որն այսօր պատմական իրողություն է, մեր ժողովրդի մեծագույն ձեռքբերումը»,- ասվում է հաղորդագրության մեջ:
Համաքաղաքացիներին դիմելով՝ Կարապետյանը նշեց, որ անկախության յուրաքանչյուր տարին պայքար էր ու հաղթանակ, և այսօր էլ 20-ամյա հոբելյանը նշող Հայաստանի Հանրապետությունը վստահ քայլերով շարժվում է առաջ՝ համոզված, որ զարգացման ճանապարհն անբեկանելի է:
«Մենք հավատարիմ ենք մեր պատմական ընտրությանը, ինչը բազմիցս վերահաստատել ենք մեզ պարտադրված մարտահրավերներին դիմակայելով, կառուցել, կառուցում ու կառուցելու ենք ազատ ու անկախ Հայաստանի ապագան»,- ասվում է ուղերձում:
Ըստ քաղաքապետի՝ անկախության տարիների ձեռքբերումները, պետության օր օրի աճող հեղինակությունն ու վարկը ժամանակակից աշխարհում լավագույն ապացույցն են, որ «տակավին երիտասարդ մեր պետությունն արժանի ժառանգորդն է հազարամյա պատմություն ունեցող մեր ավանդույթների»:
Բացի այդ քաղաքապետը նշեց, որ այս նշանավոր տոնի հետ երկիրը նշում է նաև սիրելի մայրաքաղաքի 2793-րդ տարեդարձը։ «Արդեն ավանդույթ դարձած «Էրեբունի-Երևանը» համայն հայության տոնն է՝ հայրենիքի հետ մեր ժողովրդի տարբեր հատվածների կապերի սերտացման, մեր պետականության շուրջ համախմբման լավագույն առիթներից մեկը»,- ասաց նա:
Կարապետյանը համոզմունք հայտնեց, որ ժողովրդի միասնականությունը, պետության շուրջ համախմբվածությունը, Երևանի հանդեպ անկեղծ սերն ու նվիրվածությունը հայ ժողովրդի հզորության գրավականն է:
«Սրտանց ցանկանում եմ, որ յուրաքանչյուր հայ, աշխարհի որ ծայրում էլ լինի, տարեցտարի զարգացող, ծաղկող ու լուսարձակող միշտ հին ու նոր մեր մայրաքաղաքի մասին խոսելիս առանձնահատուկ ջերմությամբ ու հպարտությամբ ասի՝ «Իմ Երևան»: Շնորհավո՛ր տոնդ, Հայաստա՛ն, շնորհավո՛ր տոնդ, Երևա՛ն»,- իր ուղերձում նշել է քաղաքապետը:
Այս տարի սեպտեմբերի 21-ին նշվում է ՀՀ անկախության 20-ամյակը և Երևանի օրը: -0-
