Հայաստանի նախագահն ընդգծել է Գերմանիայի հետ հարաբերությունների ամրապնդման կարևորությունը

ԵՐԵՎԱՆ, 15 սեպտեմբերի. /Նովոստի-Արմենիա/. Հայաստանի համար կարևոր է Գերմանիայի Դաշնային Հանրապետության հետ հարաբերությունների ամրապնդումն ու խորացումը, հայտարարել է Հայաստանի նախագահ Սերժ Սարգսյանը Գերմանիայի Դաշնային Հանրապետության Բունդեսթագի «Գերմանիա-Հարավային Կովկաս» խորհրդարանական խմբի պատվիրակության հետ հանդիպման ընթացքում:

Ինչպես հայտնում է նախգահի մամուլի ծառայությունը, Սարգսյանը պատվիրակության այցը Հայաստան բնութագրել է որպես երկու երկրների միջև փոխադարձ վստահության խորացմանն ուղղված քայլ և բարձր է գնահատել երկու երկրների միջև տարբեր մակարդակի փոխայցելությունները, Հայաստանի և Գերմանիայի միջև հարաբերությունների ամրապնդմանն ուղղված երկկողմ ջանքերը:

Սերժ Սարգսյանը շնորհակալություն է հայտնել Գերմանիայի կառավարությանը՝ համագործակցության և տարբեր ոլորտներում Հայաստանին ցուցաբերվող օժանդակության համար:

Զրուցակիցները կարևորել են նաև միջխորհրդարանական համագործակցության դերը երկու երկրների միջև հարաբերությունների սերտացման գործում: -0-