Խորովածի փառատոնը, որ այս տարի կանցկացվի Լոռու մարզի Ախթալա քաղաքում սեպտեմբերի 17-18-ը, մոտ հինգ հազար այցելու կունենա, հինգշաբթի լրագրողներին հայտնեց «Հայկական խոհարարական ավանդույթների պահպանում և զարգացում» հասարակական կազմակերպության նախագահ Սեդրակ Մամուլյանը:
«Խորովածի փառատոնը ոչ միայն հայկական խոհանոցի մասին բարձրաձայնելու ևս մեկ ձև է, այլ նաև Հայաստանն աշխարհին ներկայացնելու, մեր երկրի նկատմամբ հետարքրքրություն առաջացնելու հնարավորություն: Սա ընդունված պրակտիկա է, նման փառատոներ հայտնի են զբոսաշրջիկներին ողջ աշխարհում»,- ասաց նա:
Նրա խոսքով, փառատոնը մեծ տոն է, որին կմասնակցեն տարբեր տարիքի և մասնագիտության տեր մարդիկ:
«Խորովածի պատրաստման գործում կմրցեն տարբեր մասնագիտությունների և հասարակության տարբեր շերտերի ներկայացուցիչներ, մասնավորապես, ֆուտբոլի, լրագրողների, հաշմանդամների խմբեր»,- նշեց Մամուլյանը:
Նա հայտնեց նաև, որ կկազմակերպվի Երևանի բնակիչների տեղափոխում Ախթալա և վերադարձ 3 հազար դրամով (մոտ $8), իսկ հավաքված գումարը կհատկացվի բարեգործական նպատակների:
«Մենք կփորձենք առավելագույնս մատչելի գին ապահովել, որպեսզի փառատոնի յուրաքանչյուր այցելու կարողանա վայելել խարովածը»,- հավելեց կազմակերպիչը:
Խորովածի փառատոնն անցկացվում է արդեն երրորդ տարին:
Միջոցառումը կանցկացվի սեպտեմբերի 18-ին ՀՀ Լոռու մարզի Ախթալա քաղաքում, փառատոնի կազմակերպիչներն են՝ Էկոնոմիկայի նախարարությունը, «Հայ խոհարարական ավանդույթների զարգացման և պահպանման» հասարակական կազմակերպությունը, Լոռու մարզպետարանը:
Փառատոնը կրելու է «Երբ գալիս է սեպտեմբերը» խորագիրը: Փառատոնի շրջանակում նախատեսվում է Արմեն Ջիգարխանյանի` խորոված անելիս, բրոնզաձույլ արձանի բացումը:
Ինչպես հաղորդում է «Հայ խոհարարական ավանդույթների զարգացման և պահպանման» հասարակական կազմակերպության մամուլի ծառայությունը, փառատոնի ընթացքում նախատեսված է մի շարք հետաքրքիր միջոցառումների անցկացում:
Փառատոնին հրավիրված է նաև հայտնի բռնցքամարտիկ, IBO վարկածով թեթև քաշային կարգում աշխարհի չեմպիոն Վիկ (Վախթանգ) Դարչինյանը
Մասնավորապես, ՀՀ անկախության 20-ամյակին նվիրված 20 մետրանոց մանղալ է կառուցվել, որի վրա ՀՀ ազգային փոքրամասնությունների ներկայացուցիչները, ինչպես նաև Վրաստանի, Ռուսաստանի, Եվրոպայի երկրների մասնակիցներն իրենց ազգային խոհանոցի կանոններով խորոված կպատրաստեն: -0-
