ԼՂՀ ՊԲ ժամկետային զինծառայողը զոհվել է համածառայակցի կողմից զենքի հետ վարվելու կանոնների խախտման հետևանքով արձակված կրակոցներից

ԼՂՀ ՊԲ ժամկետային զինծառայող Հայկ Վասիլիի Մկրտչյանը մահացել է համածառայակից, ժամկետային զինծառայող Լենդրուշ Սամվելի Նազլուխանյանի կողմից զենքի հետ վարվելու կանոնների խախտման հետևանքով արձակված կրակոցներից, հաղորդում է ՀՀ պաշտպանական գերատեսչության մամուլի ծառայությունը։

Ավելի վաղ ԼՂՀ ՊԲ լրատվության և քարոզչության բաժնից տեղեկացրել էին, որ միջադեպը տեղի է ունեցել ժամը 06։00-ի սահմանում արևելյան ուղղությամբ տեղակայված մարտական դիրքերում։ Շարքային Մկրտչյանը մարտական հերթապահություն է իրականացրել։

«Փաստի առթիվ ՀՀ ՊՆ քննչական ծառայությունում հարուցվել է քրեական գործ` ՀՀ քրեական օրենսգրքի 373 հոդվածի 3-րդ մասով»,- ասվում է հաղորդագրության մեջ։

Կատարվում է նախաքննություն։ -0-