ԵՐԵՎԱՆ, 7 սեպտեմբերի. /Նովոստի-Արմենիա/. ՄԱԿ-ի Անվտանգության խորհրդին Ադրբեջանի հնարավոր ոչ մշտական անդամակցությունը չի նպաստի այդ կառույցի հեղինակության բարձրացմանը, հայտարարել է ՀՀ արտգործնախարար Էդվարդ Նալբանդյանը։
«Դա արդեն որոշակի երկրների պատասխանատվության հարցն է՝ արդյոք նրանք իրենց ձայնը կտա՞ն Ադրբեջանին։ Բայց մի բան հաստատ է՝ ԱԽ-ի հեղինակությանը դա չի նպաստի»,- չորեքշաբթի Հարավային Կովկասի և Վրաստանի ճգնաժամի հարցերով Եվրամիության ներկայացուցիչ Ֆիլիպ Լեֆորտի հետ համատեղ ճեպազրույցի ընթացքում ասել է Նալբանդյանը։
Ըստ նրա՝ ՄԱԿ ԱԽ գլխավոր նպատակն է խաղաղության հաստատումը, աջակցումը և ամրապնդումը։
«Հարց է առաջանում՝ ինչպե՞ս է ռազմական քաղաքականությամբ երկիրը, որի ղեկավարությունը հպարտանում է, որ վեց տարվա ընթացքում 20 անգամ ավելացրել է իր ռազմական բյուջեն, մի երկիր, որն ուժի կիրառման սպառնալիքներն իր քաղաքականության մասն է դարձրել և որն, ըստ էության, սպառնում է խաղաղությանը, կարող է հավակնել ՄԱԿ ԱԽ-ի անդամակցությանը»,- նշել է Նալբանդյանը։
Նախարարը նաև ավելացրել է, որ ՄԱԿ ԱԽ-ին անդամակցելու Ադրբեջանի հավակնության կապակցությամբ շատ այլ հարցեր են առաջանում։
«Օրինակ՝ Ադրբեջանը, որը բանակցություններ է տանում ԵՄ-ի հետ ասոցիացման ուղղությամբ, ԱԽ-ի անդամակցության պայքարում դեմ է դուրս եկել ԵՄ երկու անդամ երկրներին՝ Հունգարիային և Սլովենիային՝ այդ կերպ կարծելով, որ կարող է իր պարտավորությունները՝ որպես կազմակերպության անդամ, ավելի լավ կատարել, քան ԵՄ անդամ երկրները»,- ընդգծել է Նալբանդյանը։
ՄԱԿ-ի 2012-13 թթ. Անվտանգության խորհրդի ոչ մշտական անդամների՝ հոկտեմբերին նախատեսված ընտրություններին Հունգարիայի և Սլովենիայի հետ միաժամանակ առաջադրվել է նաև Ադրբեջանի թեկածությունը:
Ադրբեջանական ղեկավարությունն ակտիվորեն կոչ է անում ՄԱԿ-ի անդամներին, մասնավորպես, Իսլամական կոնֆերանս կազմակերպության և Արաբական երկրների լիգայի անդամ երկրներին՝ աջակցել Ադրբեջանի թեկնածությանը:--0—
