IBO վարկածով թեթև քաշային կարգում աշխարհի չեմպիոն Վիկ Դարչինյանը «Գոլոս Արմենիի» թերթին տված հարցազրույցում հայտնել է, որ հարավաֆրիկացի Էվանս Մբամբայի դեմ մենամարտում իրավունք չունի պարտվելու:
IBF, WBA, WBC և IBO վարկածներով աշխարհի ութակի չեմպիոն, IBF, WBA և WBC վարկածներով գերթեթև քաշային կարգում աշխարհի բացարձակ չեմպիոն Դարչինյանը (40 մրցապայքար, 37 հաղթանակ) սեպտեմբերի 3-ին Երևանում 12 ռաունդով մենամարտ կանցկացնի հարավաֆրիկացի Էվանս Մբամբայի դեմ (19 մրցապայքար, 18 հաղթանակ): Մրցապայքարն անցկացվում է «Հայաստանն ընդդեմ աշխարհի» պրոֆեսիոնալ բռնցքամարտի երեկոյի շրջանակներում: Սիրողական կարիերայի ավարտից հետո առաջին անգամ Դարչինյանը մենամարտ կանցկացնի Հայաստանում:
«Ինձ համար շատ կարևոր է հաղթանակ տանել հայ երկրպագուների աչքի առջև, այդ պատճառով պատրաստվածությանը ես առավելագույն պատասխանատվությամբ եմ մոտեցել: Այս մենամարտը ես կապում եմ Հայաստանի պրոֆեսիոնալ բռնցքամարտի ապագայի հետ, և ես պարտվելու իրավունք չունեմ»,- ասաց Դարչինյանը՝ ավելացնելով, որ անշլագ է ակնկալում:
Միաժամանակ նա նշեց, որ պատրաստվում է իր հաղթանակը նվիրել Հայաստանի և Արցախի անկախության 20-ամյակին:
Ըստ նրա՝ հակառակորդի ընտրությունն իրականացվել է Բռնցքամարտի միջազգային կազմակերպության (IBO) կողմից, քանի որ այդ մրցապայքարում նա պետք է պաշտպանի IBO վարկածով չեմպիոնական գոտին:
«Հարավաֆրիկացի Էվանս Մբամբան 29 տարեկան է: Նա վատ բռնցքամարտիկ չէ, ագրեսիվորեն է կռվում և մինչև հիմա միայն մեկ պարտություն ունի: Բայց ես պարտավոր եմ տանը պաշտպանել իմ չեմպիոնական գոտին»,- ընդգծեց Դարչինյանը:
Ինչ վերաբերում է կազմակերպչական հարցերին, ապա ըստ նրա՝ պրոֆեսիոնալ բռնցքամարտի երեկոյի կազմակերպման համար շուրջ 1 մլն դոլար է ծախսվել:
«Առանց երկրի նախագահի (Սերժ Սարգսյանի) աջակցության, հովանավորների՝ ՀՀ ազգային օլիմպիական կոմիտեի նախագահ Գագիկ Ծառուկյանի, Արա Աբրահամյանի, Հովիկ Հովսեփյանի, նման շոու անհնար էր կազմակերպել: Հատուկ շնորհակալություն եմ ուզում հայտնել Սերժ Սարգսյանին, ով, կարելի է ասել, օրհնեց ինձ առաջիկա շոուի կազմակերպման համար»,- ասաց բռնցքամարտիկը:
Միաժամանակ նա նշեց, որ առաջին անգամ Հայաստանում նման մակարդակի միջոցառման անցկացումը հեշտ չէր, և կազմակերպիչները մի շարք բարդությունների են հանդիպել, այդ թվում նաև այն պատճառով, որ երեկոյի գրեթե բոլոր մասնակիցները, ներառյալ դատավորները, արտերկրից են ժամանելու:
«Անհրաժեշտ է անվտանգություն, բժիշկների առկայություն և բազմաթիվ այլ կարևոր կազմակերպչական պահեր ապահովել: Շոուն նաև կհեռարձակվի հեռուստատեսությամբ, ընդ որում ոչ միայն Հայաստանում: Հուսով եմ, որ բոլոր հյուրերը, այդ թվում միջազգային բռնցքամարտի աստղերը, գոհ կմնան մեր հյուրընկալ երկրի ընդունելությունից»,- ասաց Դարչինյանը:
Սեպտեմբերի 3-ին Երևանում կայանալիք Դարչինյան-Մբամբա գլխավոր մրցապայքարից բացի, տեղի կունենա նաև հայ մարզիկների մասնակցությամբ ևս 4 մարտ՝ Ազատ Հովհաննիսյանի (56 կգ, պրոֆեսիոնալ բռնցքամարտում դեռ միայն մեկ մենամարտ է անցկացրել), ԱՄՆ-ից Գաբրիել Թոլմաջյանի (60կգ, 12 մարտ, 10 հաղթանակ, որոնցից 3-ը` նոկաուտով, 1 պարտություն, 1 ոչ-ոքի), Բելգիայից Հովհաննես Ժամկոչյանի (59 կգ) և Լիտվայից Ագնեսա Բոժայի (53կգ)։
Նրանց հակառակորդների անունները դեռ հայտնի չեն, միայն հայտնի է, որ նրանք Վրաստանից, Եվրոպայի երկրներից, ԱՄՆ-ից և Մեքսիկայից են։-0-
