«Կոնտինենտալ» ռեստորանային համալիրում հարսանյաց հանդեսից հետո 26 մարդ է հոսպիտալացվել՝ «սննդային սուր թունավորում, սննդային տոքսիկոինֆեկցիա» նախնական ախտորոշմամբ, հաղորդում է առողջապահության նախարարության կայքը:
Տեղեկատվության համաձայն` «սննդային սուր թունավորում, սննդային տոքսիկոինֆեկցիա» նախնական ախտորոշմամբ քաղաքի տարբեր հիավանդանոցներ 26 մարդու տեղափոխման մասին տեղեկությունն առողջապահության նախարարություն ստացվել է նախօրեին:
Ահազանգը ստանալուն պես ՀՀ առողջապահության նախարարության մասնագետների կողմից կազմակերպվել և իրականացվել է օպերատիվ համաճարակաբանական հետազոտություն, ինչի արդյունքում պարզվել է, որ վարակի հավանական պատճառը մանրէային աղտոտման ենթարկված սնունդն է՝ հավի մսից պատրաստված աղցանը:
Տվյալ ենթադրությունը հիմնավորվել է, քանի որ տուժածների մոտ արձանագրված վարակի գաղտնի շրջանի գրեթե նույն տևողությունն ու կլինիկական ախտանշանները, ինչպես նաև դրանց միաժամանակ ի հայտ գալը, բնորոշ են սննդային թունավորումներին:
Ինչպես հաղորդում է առողջապահության նախարարությունը, հիվանդների շրջանում արձանագրվել է թեթև կլինիկա` փսխում, սրտխառնոց, թուլություն ախտանշաններով: Որոշ հիվանդների մոտ գրանցվել է նաև ջերմություն և լուծ: Այս պահի դրությամբ բոլոր հիվանդները առողջացմամբ դուրս են գրվել:
«Կանխարգելիչ և հակահամաճարակային միջոցառումները շարունակվում են` զուգորդելով լաբորատոր հետազոտություններով: Վերջնական արդյունքների վերաբերյալ կտրամադրվի լրացուցիչ տեղեկատվություն»,- ասվում է հաղորդագրության մեջ: -0-
