ԵՐԵՎԱՆ, 23 օգոստոսի. /Նովոստի-Արմենիա/. «Մեսրոպ Մաշտոց» արշավախմբի շրջանակներում «Արմենիա» առագաստանավի շուրջերկրյա նավարկության մասին ֆիլմ կնկարահանվի և գիրք կհրատարակվի, երեքշաբթի մամուլի ասուլիսում հայտնեց նավարկության ղեկավար, գրող-հրապարակախոս և հասարակական գործիչ Զորի Բալայանը։
Ըստ նրա` ֆիլմի նկարահանման համար կօգտագործվեն երեք օվկիանոսներով առագաստանավի ճանապարհորդության ընթացքում արված տեսանյութերը։
Բալայանն ավելացրեց նաև, որ պատրաստվում է ամփոփել իր ուղևորանոթերը և հրապարակել դրանք։ «Նավարկության ընթացքում տեղի ունեցած բոլոր մանրամասները և հետաքրքիր դեպքերը մանրամասն կգրվեն «Ծովից ծով Հայաստան» իմ գրքի երեք հատորներում»,- ասաց Բալայանը։
«Մեսրոպ Մաշտոց» արշավախմբի շրջանակներում շուրջերկրյա ճանապարհորդությունը մեկնարկել էր 2009 թ.-ի մայիսի 28-ին Վալենսիայի նավահանգստից: Ճանապարհորդության ընթացքում հատուկ երթուղի է մշակվել, որի շրջանակներում արշավախումբը եղել է բոլոր վայրերում, որտեղ գոնե մեկ հայ է ապրում: «Արմենիան» խարիսխ է գցել հինգ մայրցամաքների նավահանգիստներում, նավարկել է Ատլանտյան, Խաղաղ և Հնդկական օվկիանոսների ջրերում:
Արի ծովագնացների կարևորագույն նվաճումների թվում Բալայանը նշեց Չիլիի Հորն հրվանդանի վրա հայկական խաչի տեղադրումը՝ ի հիշատակ ամբողջ աշխարհի անմեղ զոհերի։
Հորն հրվանդանը Հրո երկիր արշիպելագի ամենահարավային կղզին է։ 4010 տարիների ընթացքում, պատմաբանների տվյալներով, Հորն հրվանդանում նավաբեկության են ընթարկվել 1000 նավեր, զոհվել է 15 հազար ծովային։
«Դեռևս երեք տարի առաջ ինձ մոտ գաղափար հղացավ ողջ աշխարհի անմեղ զոհերի հիշատակին հայկական խաչ կանգնեցնել և այդ ժամանակ իմացա, որ հայտնի ռուս ճանապարհորդ Ֆյոդոր Կոնյուխովն ուղղափառ խաչ է տեղադրել Հորն հրվանդանում»,- պատմեց Բալայանը։
Ըստ նրա` հայկական խաչը տեղադրվել է Հորն հրվանդանի գագաթին գտնվող փոքրիկ մատուռում։ «Մենք մեծ դժվարությունների հետ բախվեցինք, քանի որ գագաթին հասնելը հեշտ չէր մշտական քամիների և փոթորիկների պատճառով»,- նշեց Բալայանը։
Նա ավելացրեց, որ խաչի պատմությունը նույնպես շատ հետաքրքիր է։ «Մենք խաչը ստացանք Բուենոս Այրեսում ապրող մի հայուհուց, նրան դա հասել էր հորից, ով Արևմտյան Հայաստանի գյուղերից մեկում էր ծնվել»,- ասաց Բալայանը։
Այդ հայուհու հայրը պատմել է, որ նույնատիպ բրոնզե խաչ էլ տեղադրվել է իր հարազատ գյուղի եկեղեցում։ Այն բանից հետո, երբ թուրքերն այրել են գյուղի բնակիչներին և եկեղեցին, խաչը նույնպես կորել է։ Երկար տարիներ անց տղամարդը հայտնաբերել է խաչի նկարը և վարպետներին ճշգրիտ կրկնօրինակ է պատվիրել։
«Այդ մարդու մահից հետո նրա կինն իր դստեր միջոցով փոխանցել է խաչը մեզ, և մենք այն տեղադրել ենք հրվանդանի գագաթին»,- նշեց Բալայանը։
«Արմենիա» առագաստանավի շուրջերկրյա նավարկության ավարտին նվիրված հանդիսավոր արարողությունը տեղի ունեցավ օգոստոսի 11-ին՝ Լիմասոլ կղզում, Հայաստանի նախագահ Սերժ Սարգսյանի, նրա կիպրոսցի գործընկեր Դեմետրիոս Խրիստոֆիասի, տեղական իշխանությունների և հայկական համայնքի ներկայացուցիչների ներկայությամբ։
Նավարկության անդամները Երևան ժամանեցին օգոստոսի 19-ին։--0--
