ԵՐԵՎԱՆ, 20 օգոստոսի. /Նովոստի-Արմենիա/. Օձերի թույնի ուսումնասիրման լաբորատորիա է բացվել ՀՀ ԳԱԱ ֆիզիոլոգիայի ինստիտուտում, գրում է «Գոլոս Արմենիի» թերթը: Ըստ հոդվածի՝ նոր լաբորատորիայի աշխատակիցների առջև կանգնած են ոչ միայն զուտ գիտական, այլև պրակտիկ խնդիրներ:
«Խնդիրն այն է, որ Հայաստանում օձի խայթոցի դեպքում օգտագործվում է միջինասիական գյուրզայի թույնի հիման վրա ստացված շիճուկը, որի կիրառումն, իհարկե, թույլ է տալիս խուսափել թունավոր օձի խայթոցի ողբերգական հետևանքներից, սակայն այդ շիճուկը նախատեսված է այլ տեսակի թույնի չեզոքացման համար, և բուժումն ավելի արդյունավետ կլիներ, եթե շիճուկը պատրաստվեր նույն ենթատեսակի գյուրզայի թույնի հիման վրա», - նշվում է հոդվածում:
Ինչպես ցույց են տվել նախորդ տարի հայ և իսպանացի գիտնականների կողմից անցկացված կենսաքիմիական ուսումնասիրությունները, հայկական գյուրզայի թույնը զգալիորեն տարբերվում է միջինասիական և միջերկրական գյուրզայի թույնից, իսկ թույների բաղադրության նմանությունը չի գերազանցում 4 տոկոսը:
Այս տվյալների հիման վրա գաղափար է ծագել հայկական գյուրզային առանձնացնել որպես առանձին տեսակ: Լաբորատորիայի աշխատակիցները մտադիր են ստեղծել հակաթույն-շիճուկ, որը կօգտագործվի հենց հայկական գյուրզայի խայթոցի դեպքում:
Ինչպես թերթին տեղեկացրել է լաբորատորիայի վարիչ, կենսաբանական գիտությունների թեկնածու Նաիրա Այվազյանը, կոլեկտիվը բաղկացած է 21-35 տարեկան երիտասարդ գիտնականներից, որոնք օձերի թույների ուսումնասիրման բավականին փորձ ունեն:
«Լաբորատորիայի վեց աշխատակիցներից չորսն արդեն պաշտպանել են թեկնածուական դիսերտացիաներ: Մեր կողմից անցկացված հայկական իժի թույնի ուսումնասիրությունների արդյունքները հրապարակվել են արտերկրում, և այդ հոդվածը ներառվել է առավել մեջբերվողների տասնյակում... Մենք լավ գործընկերներ ունենք արտերկրում, խոշոր դրամաշնորհներ ենք ստացել, որոնց շնորհիվ առաջին անհրաժեշտության սարքավորումներ են ձեռք բերվել», - ասել է Այվազյանը թերթին:-0-
