Ադրբեջանական քարոզչությունը փորձում է Լեռնային Ղարաբաղի բնակչի կերպար ստեղծել, ով Ադրբեջանի հետ բարեկամության օգտին է հանդես գալիս և դեմ չէ ապրել այդ երկրի կազմում, կարծում է ռազմական փորձագետ Դավիթ Ջամալյանը։
«Ադրբեջանական քարոզչամեքենայի աշխատանքում նկատելի է դարձել այդ նոր ուղղվածությունը։ Հայերի հանդեպ ատելության սերմանելուն զուգահեռ ստեղծվում է մեկ այլ` ադրբեջանամետ հայի կերպարը»,- ուրբաթ լրագրողներին ասաց նա։
Ըստ փորձագետի՝ այդ տրամաբանության մեջ տեղավորվում է Կազանի հանդիպումից հետո Ադրբեջանի ԱԳՆ ղեկավար Էլմար Մահմեդյարովի կողմից արված հայտարարոթւյունն այն մասին, որ պետք է աշխատել, որպեսզի հանրաքվեի ընթացքում Լեռնային Ղարաբաղի ժողովուրդը քվեարկի Ադրբեջանի հետ միացնալու օգտին։
«Մենք այդ մոտեցումը տեսնում ենք նաև ղարաբաղցի 13-ամյա աղջկա՝ Ադելինա Ավագիմյանի նամակի պատասխանում, որտեղ փորձ է արվել նրան համապատասխանեցնել այդ կերպարին և ներկայացնել որպես Ադրբեջանի բնակիչ»,- նշեց նա։
Ինչպես ավելի վաղ էր տեղեկացվում, Լեռնային Ղարաբաղից 13-ամյա հայ աշակերտուհի Ադելինա Ավագիմյանը նամակ է գրել Ադրբեջանի նախագահ Իլհամ Ալիևին։
Այդ դիմումին Ադրբեջանի Հանրապետության նախագահի աշխատակազմի կողմից պատասխան էր ստացվել, որն ուղարկված էր Ադրբեջանի նախագահի աշխատակազմի քաղաքական վերլուծության և տեղեկատվական ապահովման բաժնի ղեկավար Էլնուր Ասլանովի անունից։
Նամակում, մասնավորապես, նշված է. «Սիրելի Ադելինա, Ադրբեջանի Հանրապետության նախագահի աշխատակազմն ուշադիր է նախագահ Իլհամ Ալիևի անունով ուղղված Ադրբեջանի յուրաքանչյուր բնակչի դիմումի նկատմամբ, և այդ պատճառով քո նամակը չէր կարող անպատասխան մնալ»։
Ջամալյանն ավելացրեց, որ նման քարոզչության նպատակներով նաև այնպիսի մարդիկ են ներգրավվում, ինչպիսին է ադրբեջանամետորեն տրամադրված խաղաղապահ նախաձեռնությունների կովկասյան կենտրոնի նախագահ Գեորգի Վանյանը, ինչպես նաև տարբեր կազմակերպություններ, որոնք միջոցներ են հատկացնում քաղաքական ենթատեքստ կրող միջոցառումների անցկացման համար։
«Օրինակ՝ ադրբեջանական ֆիլմերի փառատոնը։ Դա առաջին հայացքից մշակութային միջոցառում է, որտեղ, սակայն, հստակորեն քաղաքական դրդապատճառներ են նկատվում։ Դա երիտասարդ սերնդի հետ «աշխատելու» և նրանց ադրբեջանամետ դիրքորոշում հարկադրելու փորձ է»,- ասաց նա։
Ռազմական փորձագետն ընդգծեց, որ անհրաժեշտ է օպերատիվ արձագանքել նման դեպքերին, ինչպես նաև ամրապնդել Հայաստան-Լեռնային Ղարաբաղ համատեղ տեղեկատվական դաշտը։
«Մենք հիմնականում Արցախի մասին լսում ենք ղարաբաղյան հակամարտության համատեքստում։ Իսկ այնտեղ կյանքը եռում է, կարևոր իրադարձություններ են տեղի ունենում, շատ հետաքրքիր մշակութային միջոցառումներ են անցկացվում»,- նշեց նա։ -0-
