«Արմենիա» առագաստանավի անձնակազմը վերադարձել է Երևան շուրջերկրյա ճանապարհորդությունից հետո

ԵՐԵՎԱՆ, 19 օգոստոսի. /Նովոստի-Արմենիա/. «Մեսրոպ Մաշտոց» արշավախումբը, որը մոտավորապես մեկ շաբաթ առաջ ավարտեց շուրջերկրյա ճանապարհորդությունը «Արմենիա» առագաստանավով, ուրբաթ վերադարձել է Երևան, հաղորդում է ՀՀ սփյուռքի նախարարության մամուլի ծառայությունը:

Տեղեկատվության համաձայն՝ հինգշաբթի լույս ուրբաթ գիշերը «Զվարթնոց» միջազգային օդանավակայանում արշավախմբին դիմավորեցին ՀՀ սփյուռքի նախարար Հրանուշ Հակոբյանը, պաշտոնատար այլ անձինք, հասարակական կազմակերպությունների ներկայացուցիչներ, արշավախմբի անդամների հարազատներ, ընկերներ և բազմաթիվ հայրենակիցներ:

«Մեսրոպ Մաշտոց» արշավախմբի շրջանակներում՝ արշավախմբի ղեկավար, գրող, հասարակական գործիչ Զորի Բալայանի գլխավորությամբ շուրջերկրյա ճանապարհորդությունը մեկնարկել էր 2009 թ.-ի մայիսի 28-ին Վալենսիայի նավահանգստից: Ճանապարհորդության ընթացքում հատուկ երթուղի է մշակվել, որի շրջանակներում արշավախումբը եղել է բոլոր վայրերում, որտեղ գոնե մեկ հայ է ապրում: «Արմենիան» խարիսխ է գցել հինգ մայրցամաքների նավահանգիստներում, նավարկել է Ատլանտյան, Խաղաղ և Հնդկական օվկիանոսների ջրերում:

Առագաստանավի շուրջերկրյա ճանապարհորդության ավարտին նվիրված հանդիսավոր արարողությունը տեղի է ունեցել օգոստոսի 11-ին Լիմասոլ քաղաքի նավահանգստում ՀՀ նախագահ Սերժ Սարգսյանի, նրա կիպրոսցի գործընկեր Դեմետրիոս Խրիստոֆիասի, տեղական իշխանությունների և հայկական համայնքի ներկայացուցիչների մասնակցությամբ:-0-