ԵՐԵՎԱՆ, 19 օգոստոսի. /Նովոստի-Արմենիա/. Ընդդիմադիր Հայ Ազգային Կոնգրեսի (ՀԱԿ) և Հայաստանի իշխող կոալիցիայի միջև երկխոսության աշխատանքային խմբերի հերթական՝ վեցերորդ հանդիպումը, որը պետք է տեղի ունենար այսօր, հետաձգվել է և նշանակվել օգոստոսի 23-ին, «Նովոստի-Արմենիա» գործակալությանը հայտնեցին ՀԱԿ-ի մամուլի ծառայությունից։
Օգոստոսի 16-ին տեղի ունեցած հանդիպման ժամանակ ձեռք էր բերվել նախնական պայմանավորվածություն` հաջորդ հանդիպումն օգոստոսի 19-ին անցկացնելու վերաբերյալ:
«Այսօր պատվիրակությունների ղեկավարներ Լևոն Զուրաբյանի և Դավիթ Հարությունյանի միջև կայացած հեռախոսազրույցի ժամանակ վերջնական պայմանավորվածություն է ձեռք բերվել հանդիպումը օգոստոսի 23-ին, ժամը 12-ին անցկացնելու մասին»,- նշեցին մամուլի ծառայությունից։
Հինգերորդ հանդիպման արդյունքում ՀԱԿ-ի աշխատանքային խմբի համակարգող Լևոն Զուրաբյանը և կոալիցիայի պատվիրակության ղեկավար Դավիթ Հարությունյանը երկխոսությունը շարունակելու վերաբերյալ համատեղ հայտարարություն էին ներկայացրել։
Փաստաթղթի համաձայն` կողմերն առայժմ զերծ կմնան օգոստոսի 9-ին Ոստիկանության և ՀԱԿ-ի ակտիվիստների միջև տեղի ունեցած միջադեպի մեկնաբանություններից՝ մտադրվելով այդ իրադարձությունները քննարկել հաջորդ հանդիպմանը։
Դրանից մեկ օր առաջ Հայ ազգային կոնգրեսը Հայաստանի իշխանություններին 24 ժամ էր տվել ՀԱԿ-ի երեք ակտիվիստների նկատմամբ խափանման միջոցը փոխելու հարցին լուծում տալու համար։ Կենտրոն և Նորք Մարաշ վարչական շրջանների ընդհանուր իրավասության դատարանի որոշմամբ` ՀԱԿ-ի երեք ակտիվիստներ Տիգրան Առաքելյանը, Արտակ Կարապետյանը և Սարգիս Գևորգյանը ձերբակալվել են երկու ամիս ժամկետով Հայաստանի Քրեական Օրենսգրքի 258-րդ հոդվածի 3-րդ մասի 1 կետի (Խուլիգանություն) և 316-րդ հոդվածի առաջին մասի (Իշխանության ներկայացուցչի նկատմամբ բռնի գործողություններ կիրառելը) հատկանիշներով։
Ավելի վաղ` չորրորդ հանդիպման ժամանակ ՀԱԿ-ն իշխանություններին ներկայացրել էր խորհրդարանական և նախագահական արտահերթ ընտրությունների անցկացման անհրաժեշտությունը հիմնավորող 85 էջանոց փաստաթուղթ, որի վերաբերյալ կոալիցիան պետք է ներկայացներ իր դիրքորոշումը։ Սակայն հինգերորդ հանդիպման քննարկման առարկա էր դարձել ընդդիմության ակտիվիստների ձերբակալության հետ կապված միջադեպը։-0-
