Երեքշաբթի Լեռնային Ղարաբաղի Հանրապետության պաշտպանության բանակի զորամասերից մեկն այցելության ընթացքում ՀՀ վարչապետ Տիգրան Սարգսյանը բարձր գնահատական է տվել ղարաբաղցի զինվորների ռազմական և հոգեբանական պատրաստվածության մակարդակին, հաղորդում է կառավարության մամուլի ծառայությունը:
Այցի շրջանակներում Սարգսյանը Հայաստանի և Լեռնային Ղարաբաղի պաշտպանության նախարարներ Սեյրան Օհանյանի, գեներալ-լեյտենանտ Մովսես Հակոբյանի և կառավարական պատվիրակության անդամների ուղեկցությամբ այցելել է Արցախի պաշտպանական բանակի առաջապահ դիրքեր:
«Սիրելի զինվորներ, դուք պետք է հպարտ լինեք, որ այսօր ծառայում եք Լեռնային Ղարաբաղի պաշտպանության բանակում և պետք է հպարտ լինեք այն պատճառով, որ դուք հաղթանակած բանակի ներկայացուցիչներ եք: Պետք է շարունակեք այն ավանդույթները, որ արդեն իսկ դրել են ձեր ծնողները` հաղթելով Լեռնային Ղարաբաղի համար մղվող պայքարում: Այսօր ձեր խնդիրն է պահպանել այն նվաճումները, որ ունենք և օր օրի ավելացնել մեր բանակի մարտունակությունը»,- զինվորներին դիմել է Սարգսյանը:
Նա հավաստիացրել է, որ ՀՀ կառավարությունը ջանք չի խնայի ԼՂՀ ՊԲ մարտունակության բարձրացման համար, որպեսզի ղարաբաղյան բանակը համապատասխանի ժամանակակից աշխարհի լավագույն բանակներին ներկայացվող չափանիշներին:
«Մենք տեսնում ենք, որ զինվորը հպարտ է, համաձակ, կազմակերպված, գիտի իր գործը, պրոֆեսիոնալ է, և այդ ամենը հույս է ներշնչում, որ մեր զինված ուժերի մարտունակության աստիճանն օր օրի ավելի է բարձրանալու: Դա ամենակարևորն է»,- ասել է կառավարության ղեկավարը:
Անդրադառնալով հակառակորդի կողմից հաճախակի հնչող ռազմատենչ հայտարություններին` գործադիրի ղեկավարը նշել է, որ դրանց լավագույն պատասխանը մեր բանակի մարտունակության բարձրացումն է, և այն ինչ այսօր կատարվում է հայկական զինված ուժերում, այն վառ ապացույցն է, որ երկիրը ճիշտ ուղու վրա է:
Զորմասաերից մեկն այցելության ընթացքում հայկական կառավարության ղեկավարը մասնակցել է զինվորների ռազմաուսումնական վարժանքներին և ծանոթացել ծառայության պայմաններին: -0-
