ԵՐԵՎԱՆ, 28 հուլիսի. /Նովոստի-Արմենիա/. Հայաստանի, Ռուսաստանի և Ադրբեջանի նախագահների կազանյան հանդիպումը ոչ մի դեպքում չի կարելի ձախողված համարել, հայտարարել է ՀՀ նախագահ Սերժ Սարգսյանը հինգշաբթի իր լեհ գործընկեր Բրոնիսլավ Կոմորովսկու հետ համատեղ ճեպազրույցի ժամանակ:
Լեհաստանի նախագահ Բրոնիսլավ Կոմորովսկին ՀՀ նախագահի հրավերով նախօրեին պաշտոնական այցով ժամանել է Երևան:
«Եվ մեր, և միջազգային հանրության սպասելիքները մեծ էին կազանյան հանդիպումից, բայց, ցավոք, այդ սպասելիքները չարդարացան: Կազանում մենք իրականում շատ մոտ էինք հաջողությանը: Սակայն եղավ այն, ինչ եղավ: Այս մասին ես արդեն խոսել եմ ԵԽԽՎ նիստի ընթացքում: Խոսքը անհրաժեշտ մթնոլորտի բացակայության մասին է: Առաջին հերթին պետք է բարելավվի մթնոլորտը, քանի որ չի կարելի ամեն օր, ամեն վայրկյան թունավորել սեփական ժողովրդին», - ասաց Սարգսյանը:
Նա նաև նշեց, որ անհրաժեշտ է հարգել Լեռնային Ղարաբաղի ժողովրդի` սեփական ճակատագիրը տնօրինելու, անվտանգության երաշխիքներ ունենալու և իր պատմական հայրենիքում զարգանալու օրինական իրավունքը: «Այն պարտավոր են հարգել բոլորը: Այլ լուծում գոյություն չունի», - ավելացրել է նա:
Սարգսյանը տեղեկացրել է, որ Կոմորովսկու հետ այսօր տեղի ունեցած բանակցությունների ընթացքում ներկայացրել է ղարաբաղյան հակամարտության կարգավորման վերջին զարգացումները, «որն առաջացել է ԼՂՀ ժողովրդի ինքնորոշման իրավունքի ոտնահարման հետևանքով»:
«Հայաստանի և Ղարաբաղի ժողովուրդը միայն մեկ բան են պահանջում՝ խնդիրը պետք է լուծվի միջազգային իրավունքին և սկզբունքներին համապատասխան: Այդ սկզբունքներն արտացոլված են Մադրիդյան փաստաթղթում: Այլ պահանջներ մեր ժողովուրդները չունեն, իսկ մեր պահանջները համահունչ են միջազգային հանրության պահանջների հետ», - եզրափակել է նախագահը:
Հունիսի 24-ին Կազանում տեղի է ունեցել Հայաստանի, Ռուսաստանի և Ադրբեջանի նախագահների հանդիպումը՝ նվիրված ղարաբաղյան հակամարտության կարգավորմանը, որի ընթացքում ղարաբաղյան խնդրի հարցում էական առաջընթաց ձեռք չի բերվել:
Սակայն Կազանի հանդիպման արդյունքում ընդունվել է համատեղ հայտարարություն, որում երկրի ղեկավարները արձանագրել են մի շարք հարցերի շուրջ փոխըմբռնման ձեռքբերումը, որոնց լուծումը կնպաստի Հիմնարար սկզբունքներին հավանություն տալու համար պայմանների ստեղծմանը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց հետևանքով երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
