Հայաստանի կոալիցիան և ընդդիմությունը երկխոսության օրակարգի շուրջ առաջարկներ են փոխանակել

Հայաստանի կոալիցիոն ուժերի և ընդդիմադիր ՀԱԿ-ի ներկայացուցիչների միջև երկխոսության օրակարգը ձևավորվել է, երեքշաբթի ընդդիմադիր քաղաքական գործիչների հետ հանդիպումից հետո լրագրողներին ասաց կոալիցիոն խմբի ղեկավար Դավիթ Հարությունյանը:

Նրա խոսքերով՝ օրակարգում ներառվել է քննարկմանը ենթակա երկու հարց:

ՀԱԿ-ը, մասնավորապես, առաջարկել է քննարկել արտահերթ խորհրդարանական և նախագահական ընտրությունների անցկացման հարցը՝ լեգիտիմ իշխանությունների շուտափույթ ձևավորման նպատակով:

Կոալիցիոն ուժերի առաջարկը վերաբերում է կանոնների ձևավորմանը, որոնք ուղղված են քաղաքակիրթ մրցակցության ապահովմանը՝ պատշաճ մակարդակով ընտրությունների անցկացման նպատակով:

Կոալիցիայի և ՀԱԿ-ի ներկայացուցիչների հաջորդ հանդիպումը տեղի կունենա օգոստոսի 4-ին` տեղական ժամանակով ժամը 12:00-ին: Առաջին հանդիպումը տեղի էր ունեցել հուլիսի 18-ին:

Իշխանությունների կողմից բանակցություններին մասնակցում է կոալիցիոն կուսակցությունների կողմից ձևավորված աշխատանքային խումբը, որը կազմում ներառված են ՀՀ ԱԺ պետաիրավական հարցերի մշտական հանձնաժողովի նախագահ Դավիթ Հարությունյանը, ՀՀ ԱԺ ֆինանսաբյուջետային հարցերի հանձնաժողովի նախագահ Գագիկ Մինասյանը (ՀՀԿ), ՀՀ ԱԺ եվրաինտեգրման հարցերի հանձնաժողովի նախագահ Նաիրա Զոհրաբյանը և ՀՀ ԱԺ պատգամավոր Վարդան Բոստանջյանը («Բարգավաճ Հայաստան»), Մհեր Շահգելդյանն ու ՀՀ ԱԺ պատգամավոր Խաչիկ Հարությունյանը («ՕԵԿ»):

ՀԱԿ-ի հինգ ներկայացուցիչներից բաղկացած պատվիրակությունը գլխավորում է ՀԱԿ-ի համակարգող Լևոն Զուրաբյանը: Պատվիրակության կազմում են նաև ՀԱԿ-ի կենտրոնական գրասենյակի ներկայացուցիչ Դավիթ Շահնազարյանը, ՀԱԿ-ի տնտեսական հանձնաժողովի անդամ, Մալաթիայի տարածքային կառույցի ղեկավար Վահագն Խաչատրյանը, Հայաստանի ժողովրդական կուսակցության վարչության քարտուղար Ֆելիքս Խաչատրյանը, Հայ համազգային շարժման վարչության փոխնախագահ Սամվել Աբրահամյանը:

ՀԱԿ-ը ստեղծվել է 2008 թ.-ի օգոստոսի 1-ին: ՀԱԿ-ի կազմում ներառված է շուրջ 20 քաղաքական կուսակցություն և կազմակերպություն: ՀԱԿ-ի առաջնորդն է ՀՀ առաջին նախագահ Լևոն Տեր-Պետրոսյանը:

«Բարգավաճ Հայաստան» և «Օրինաց երկիր» կուսակցությունները ընդգրկված են Հայաստանի Հանրապետական կուսակցության գլխավորած իշխող կոալիցիայի կազմում, որը ձևավորվել է 2008 թ.-ի մարտի 21-ին:-0-