Հայաստանում երեք սահմանային կետերի արդիականացումը կսկսվի աշնանը. ԱԱԽ քարտուղար

ԵՐԵՎԱՆ, 25 հուլիսի. /Նովոստի-Արմենիա/. Հայաստանում երեք սահմանային կետերի արդիականացմանն ուղղված շինարարական աշխատանքները կսկսվեն այս տարվա սեպտեմբերին կամ հոկտեմբերին, ասաց ՀՀ ԱԱԽ քարտուղար Արթուր Բաղդասարյանը եվրոպական կառույցների հետ Հայաստանի պետական մարմինների համագործակցությունը համակարգող միջգերատեսչական հանձնաժողովի 10-րդ նիստի ժամանակ:

Եվրամիությունը Հայաստանին 7,7 մլն եվրո է հատկացրել երեք սահմանային անցակետերի (Բագրատաշեն, Բավրա, Գոգավան) արդիականացման համար «Հարավային Կովկասում պետական սահմանների համալիր կառավարում» ծրագրի շրջանակներում:

«Արդիականացումից հետո էականորեն կդյուրացվեն սահմանը հատելու ընթացակարգերը, վերջապես կներդրվի «մեկ պատուհանի» համակարգը», - ընդգծեց Բաղդասարյանը:

Նա նշեց, որ սահմանային կետերի արդիականացումը նախատեսվում է ԵՄ-ի հետ համագործակցության 2009-2011 թթ.-ի ծրագրով, որն ավարտին է մոտենում:

«Մեր եվրոպացի գործընկերները բարձր են գնահատում ձեռք բերված հաջողությունները, և հարկավոր է սկսել համագործակցության 2012-2014 թթ.-ի նոր ծրագրի մշակումը», - ավելացրեց Բաղդասարյանը:

«Հարավային Կովկասում Սահմանների համալիր կառավարման» (ՀԿՍՀԿ) ծրագրի նպատակը Հայաստանում, Վրաստանում և Ադրբեջանում սահմանների համալիր կառավարման սկզբունքների գործնական մեխանիզմների ներդրումն է, ինչպես նաև ներգերատեսչական, միջգերատեսչական և միջազգային համագործակցության ընդլայնումն ու զարգացումը, մասնավորապես` Հարավային Կովկասի երկրների, ԵՄ անդամ-պետությունների և միջազգային կառույցների միջև, ինչն ուղղված է ապրանքների և մարդկանց օրինական տեղաշարժերի ապահովմանը և միաժամանակ` ցանկացած ապօրինի գործունեությունից պետական սահմանի պաշտպանվածությանը: --0-