ԵՐԵՎԱՆ, 19 հուլիսի. /Նովոստի-Արմենիա/. Կոալիցիոն ուժերի և ընդդիմադիր Հայ ազգային կոնգրեսի միջև երկխոսությունը երկրում նոր քաղաքական մշակույթի ձևավորման վկայությունն է, ասաց ՀՀԿ-ից ՀՀ ԱԺ պատգամավոր Մկրտիչ Մինասյանը:
«Առաջին հերթին՝ հարկավոր է համաձայնել այն բանի հետ, որ մեր իրականության մեջ նոր մշակույթ է ձևավորվում, որը ես՝ որպես հայ, ողջունում եմ: Ես հերքում եմ հակառակ կարծիքը, թե իշխանություններն ու ընդդիմությունը պետք է մշտական առճակատման մեջ գտնվեն», - երեքշաբթի մամուլի ասուլիսի ժամանակ ասաց Մինասյանը: Նա նշեց, որ երկխոսությունը ժամանակի թելադրանքն է :
«Ժառանգություն» ընդդիմադիր կուսակցության վարչության փոխնախագահ Ռուբեն Հակոբյանն իր հերթին երկխոսությունը համարեց «բեմադրություն, որում ամեն կողմը հետապնդում է իր նպատակները»:
Նրա կարծիքով՝ վերջին երեք տարվա ընթացքում ՀԱԿ-ին հաջողվել է քանդել Հայաստանի ընդդիմադիր դաշտը, և այժմ այն ձգտում է մոնոպոլիզացնել այն:
Հակոբյանը նաև կարծում է, որ ՀԱԿ-ը չի ձգտում արտահերթ ընտրությունների՝ համարելով դրանք անհնար, և երկխոսության հետ կապված իրավիճակը կտևի մինչև 2012 թ.-ին կայանալիք խորհրդարանական ընտրությունները:
Հանդիպման նախաձեռնողը ՀՀ ԱԺ խոսնակ Հովիկ Աբրահամյանն էր: Նա նշել է, որ կոալիցիոն աշխատանքային խումբը պատրաստ է հանդիպումների շարք սկսել ՀԱԿ-ի համապատասխան հանձնաժողովի հետ: Կոալիցիոն աշխատանքային խմբի կազմում են Դավիթ Հարությունյանը (ՀՀԿ), Գագիկ Մինասյանը (ՀՀԿ), Նաիրա Զոհրաբյանը (ԲՀԿ), Վարդան Բոստանջյանը (ԲՀԿ), Մհեր Շահգելդյանը («Օրինաց երկիր») և Խաչիկ Հարությունյանը («Օրինաց երկիր»):
Մայիսի 31-ին Ազատության հրապարակում ՀԱԿ-ի հանրահավաքի ժամանակ ՀՀ առաջին նախագահ, ՀԱԿ-ի առաջնորդ Լևոն Տեր-Պետրոսյանը հայտարարել է, որ պատրաստ են «իշխանության հետ ֆորմալ երկխոսության, այսինքն` պատվիրակությունների մակարդակով երկխոսության»: Նույն հանրահավաքի ընթացքում ընդդիմությունը հայտարարել էր, որ երկխոսությունը կարող է ընթանալ խորհրդարանական և նախագահական արտահերթ ընտրությունների հարցի շուրջ:
Երկխոսության համար ՀԱԿ-ը համապատասխան պատվիրակություն է ձևավորել, որը գլխավորել է ՀԱԿ-ի համակարգող Լևոն Զուրաբյանը:
Պատվիրակության կազմում են նաև ՀԱԿ-ի կենտրոնական գրասենյակի ներկայացուցիչ Դավիթ Շահնազարյանը, ՀԱԿ-ի տնտեսական հանձնաժողովի անդամ, Մալաթիայի տարածքային կառույցի ղեկավար Վահագն Խաչատրյանը, Հայաստանի ժողովրդական կուսակցության վարչության քարտուղար Ֆելիքս Խաչատրյանը, Հայ համազգային շարժման վարչության փոխնախագահ Սամվել Աբրահամյանը:-0-
