ՀՀ խորհրդարանի խոսնակը բարձր է գնահատում հայ-ֆրանսիական հարաբերությունների ներկա մակարդակը

Ֆրանսիայի Լիոն քաղաքի քաղաքապետ, սենատոր  Ժերար Կոլոմբի գլխավորած պատվիրակության հետ հանդիպման ժամանակ ՀՀ Ազգային ժողովի նախագահ Հովիկ Աբրահամյանը բարձր գնահատեց հայ-ֆրանսիական քաղաքական երկխոսության ներկա մակարդակը, հաղորդում է խորհրդարանի մամուլի ծառայությունը։

«Հանդիպման ընթացքում Հովիկ Աբրահամյանը շնորհակալություն հայտեց  Ֆրանսիայի իշխանություններին ֆրանսահայ համայնքի նկատմամբ ջերմ վերաբերմունքի համար»,- ասվում է հաղորդագրության մեջ։

Բացի այդ, խոսնակը կարևորեց Երևանի և Լիոնի միջև գործակցության զարգացումը` շեշտելով, որ մեծ է Լիոն քաղաքի  ներդրումը հայ-ֆրանսիական հարաբերություններում։

Շնորհակալություն հայտնելով ընդունելության համար` Լիոնի քաղաքապետ Ժերար Կոլոմբը նշեց, որ  այցի նպատակն է առավել ամրապնդել Լիոն-Երևան փոխգործակցությունը: Նրա խոսքով` Հայաստանի և Լիոնի միջև հարաբերությունները հին են ու ջերմ և սկիզբ են առել դեռևս 1915թ.-ից, երբ ցեղասպանությունից մազապուրծ հայերը  հաստատվել են Լիոնի շրջակայքում:

Կոլոմբը խորհրդարանի նախագահին ներկայացրեց երկու քաղաքների միջեւ համագործակցության կոնկրետ բնագավառները:

Հանդիպման ընթացքում կողմերը անդրադարձան ղարաբաղյան հիմնախնդրի կարգավորման գործընթացին, հայ-թուրքական հարաբերություններին, ինչպես նաև ներքաղաքական հարցերին, քննարկեցին երկուստեք հետաքրքրություն ներկայացնող այլ հարցեր ևս:  -0-