Հայաստանի վերաբերյալ Forbes-ի եզրակացությունն այդ հրատարակության աշխատակցի անհասկանալի մտավոր զրպարտությունների արդյունքն է, չորեքշաբթի հայտնեց ՀՀ էկոնոմիկայի նախարար Տիգրան Դավթյանը։
«Հոդվածի հեղինակը տվյալ անհասկանալի վարկանիշը կազմել է անգործությունից ելնելով, և ավելի շուտ ինքն էլ չի ակնկալել, որ այն կարող է նման աղմուկ բարձրացնել»,- ասաց Դավթյանը՝ ելույթ ունենալով «Ֆինանսաբանկային քոլեջ» հիմնադրամի կողմից կազմակերպած «Հայաստանը որպես հնարավորությունների իրագործման երկիր» ծրագրի շրջանակներում հանդիպման ժամանակ։
Forbes ամսագիրը հուլիսի 5-ին հրապարակել է աշխարհի ամենավատ տնտեսությունների վարկանիշը, որտեղ Հայաստանը երկրորդ տեղն է զբաղեցրել: Հանդեսն իր հաշվետվությունների համար ոչ մի թվային իլյուստրացիա չի հրապարակել։
Միաժամանակ ՀՀ ֆինանսների նախարարության փորձագետները հիմնական ցուցանիշների սեփական հետազոտությունն են ներկայացրել, որն այլ պատկեր է ցուցադրում։ Գերատեսչության վերլուծության համաձայն՝ Forbes-ի խմբագրի կողմից որպես հաշվարկման հիմք վերցված չորս ցուցանիշներից ոչ մեկը, մասնավորապես ՀՆԱ-ի աճի միջին ցուցանիշը և երեք տարվա գնաճը (ներառյալ՝ 2012թ.-ի ԱՄՀ կանխատեսումները), ընթացիկ հաշվի հաշվեկշռի երեք տարվա միջին ցուցանիշը և մեկ շնչի համար ՀՆԱ-ն, ճիշտ չեն հաշվարկված։
Ինչպես նշեց նախարարը, տվյալ վարկանիշին չպետք է այդքան մեծ ուշադրություն դարձնել։ Նա կարծում է, որ դժվար թե ողջ աշխարհում գոնե մեկ ողջամիտ մարդ գտնվի, ով կասի, որ Հայաստանի կամ Ուկրաինայի տնտեսություններն աշխարհի ամենավատերից են։
«Եթե ինչ-որ մեկը նույնիսկ այդպես է մտածում, ապա կամ նա հեռու է տնտեսությունից, կամ նորմալ տրամաբանության հետ խնդիրներ ունի»,- ավելացրեց Դավթյանը։
Նախարարը նաև նշեց, որ անհրաժեշտ է հաշվի առնել, թե ով է կազմում այս կամ այն վարկանիշը։ «Պետք է հատուկ ուշադրություն դարձնել այն փաստին, թե որքանով հեղինակավոր է հետազոտություն անցկացնող այս կամ այն հրատարակությունը կամ գործակալությունը, այլ ոչ՝ որքանով է այն ճանաչված»,- ավելացրեց նա։
Դավթյանը խորհուրդ տվեց վստահել այնպիսի հեղինակավոր միջազգային վարկանշային գործընկերությունների հետազոտություններին և գնահատականներին, ինչպիսիք են՝ «Fitch Ratings»-ը, «Moody's»-ը և «Standard & Poor's»-ը. --0—
